VOV4.Xơ Đăng - Hâi lơ 3/3, a tíu  pêi cheăng dêi Chin phuh, pôa Phạm Minh Chính, Ngế pro xiâm hnê ngăn Chin phuh pơkuâ hneăng hôp Chin phuh tiah hmâ khế 2 hơnăm 2022. Tiô tối tơbleăng a hneăng hôp, tơdroăng cheăng kâ rêh ối khế 2 ƀă 2 khế apoăng hơnăm pơtối ai pơ’lêh, tơ-ƀrê, pơtối mơnhông tung tâi tâng mâu tơdroăng cheăng tá cheăng ‘na kơmăi kơmok, pêi chiâk, tê mơdró, ‘mâi mơnhông ‘na tơdroăng tăng mơngế pêi cheăng, rak tơniăn ‘na kal kí, tơniăn tung pơlê cheăm bêng, tung rêh ối.

Tâ tá hneăng hôp tiah hmâ dêi Chin phuh khế 2/2022

‘Na tơdroăng pêi pro tung la ngiâ Ngế pro xiâm hnê ngăn tơnêi têa tối nhên, kố cho rôh ki kal, kal mơdêk rĕng ƀă pêi tro mâu pơkâ troăng rơhlâ ki tơ-brê tung pêi mâu pơkâ dêi hơnăm. Ngế pro xiâm hnê ngăn tơnêi têa pơkâ thế mâu khu xiâm, kơ koan kong pơlê séa ngăn nhên tơdroăng cheăng pơkâ pê klêi mâu tơdroăng pơcháu, mâu tơdroăng pơkâ mơnhông cheăng kâ rêh ối hơnăm 2022 hiăng châ tơbleăng, tung mê tơkŭm pêi klêi mâu tơdroăng tơkêa bro dêi khu xiâm kal kí, Khu kăn hnê ngăn, rak tơniăn tơ-ƀrê, tơdroăng cheăng.

Pơtối tơbleăng tơ-ƀrê mâu tơdroăng cheăng, troăng rơhlâ dêi tơdroăng mơnhông ƀă mơdêk cheăng kâ rêh ối, malối cho tơdroăng pêi pro thế pêi hlối tung pái khế apoăng hơnăm 2022.

Gương tơplôu ƀă tơbleăng