VOV4.Xơ Đăng - Hâi lơ 27/1, pôa Phạm Minh Chính, Ngế pro xiâm hnê ngăn Chin phuh, kăn xiâm Khu hnê mơhno cheăng tơnêi têa ‘na hbrâ mơdât pơreăng COVID-19 (Khu hnê mơhno cheăng) pơkuâ po hôp ‘no tơdrêng ing troăng hyôh Internet ƀă 63 to kong pơlê, pơlê kong kân ‘na hnoăng cheăng hbrâ mơdât pơreăng COVID-19 tơpui ‘na mâu hnoăng cheăng, troăng hơlâ hbrâ mơdât pơreăng COVID-19, malối cho tung rôh Têt Lo hơnăm nếo; hbrâ lôu péa hngêi trung hriâm ƀă lôu péa ôm hyô, ‘mâi mơnhông cheăng kâ rêh ối pơlê pơla.

Tơpui a rôh hôp, pôa Phạm Minh Chính, Ngế pro xiâm hnê ngăn tơnêi têa ăm ‘nâi, rôh hôp kố cho vâ séa ngăn, ‘nâi nhên pơreăng, malối cho séa ngăn ‘na mâu tơdroăng ki tâng ai, ki kal tơtrŏng vâ ai troăng hơlâ hbrâ rơnáu pơkâ tơleăng teăm tơdrêng pôi tá tro kơdrâ. Ing mê, veăng kum vâ kuăn pơlê châ tơdah têt tơniăn, hơniâp ro, rơdêi. Malối cho tơdroăng ki pêi pro tơdroăng ki pâk vaccine rơnó hơngui hơnăm 2022. Mơ-eăm troh tâi khế 1/2022 pâk tŭm 2 trum vaccine ăm vâi hdrêng sap ing 12 – 17 hơnăm; troh tâi hneăng má môi hơnăm 2022 pâk klêi trum má 3 ăm mâu ngế sap ing 18 tơngi klêng.

Katarina Nga tơplôu ƀă tơbleăng