Kơxo lơ 20/10, tung tơdroăng Hneăng hôp má 10, Kuô̆k hô̆i hneăng má XV, pôa Phạm Minh Chính, Ngế pro xiâm hnê ngăn Chin phuh hiăng pơchuât tơbleăng tơdroăng châ tơƀrê pêi pro Pơkâ pêi mơnhông cheăng kâ – rêh ối pơlê pơla hơnăm 2025, hneăng hơnăm 2021 – 2025 ƀă tiô tối hdrối pơkâ pêi hơnăm 2026.

Ngế pro xiâm hnê ngăn tơnêi têa tối rơdêi, hneăng cheăng pơla kố nah cho troăng prôk dêi rơkong tơpui ki krá kâk, khên tơnôu, krá chân, tuăn ngôa rơkê ƀă pói vâ xông mơ-eăm xua Tơnêi têa, xua Kuăn pơlê.

Việt Nam hiăng mơdât châ tơƀrê pơreăng kân COVID 19, rĕng lôu péa rak tơniăn cheăng kâ, châ mơnhên pơlê pơla lâp plâi tơnêi mơnhên. Tung pơla pá puât lâp plâi tơnêi, cheăng kâ Việt Nam xuân rak kơlo tơtêk hên, ối tung khu ối má môi lâp plâi tơnêi. Tiô tối hdrối GDP hơnăm 2025 tâk lối 8%; tơdâng hneăng hơnăm 2021 – 2025 châ 6,3%.

Troăng pêi cheăng kâ tâk sap ing 346 rơtal dollars hơnăm 2020 tâk 510 rơtal dollars hơnăm 2025, tâk 5 râ, ối má 32 lâp plâi tơnêi; GDP tơdâng ko mơngế châ dâng 5.000 dollars, châ 1,4 xôh tâng pơchông ƀă hơnăm 2020.