A rôh trâm mâ, Ngế pro xiâm hnê ngăn tơnêi têa tối nhên, tung pơla tung kơpong ƀă lâp plâi tơnêi dế ai hên tơdroăng ôh tá tơniăn môi tiah nôkố, tơrŭm môi tuăn, tơrŭm tơrôa tiah hmâ ton nah ƀă tơrŭm tung tŭm tơdroăng pơkâ péa kong têa cho xiâm vâ péa hdroâng mơngế rơtế rak hơniâp lĕm, tơniăn, pơtối rak tơdrăng mơnhông cheăng kâ tơniăn krê pơkuâ dêi la hlối rơtế ƀă dêi rơpó tơrŭm krá vâ mơnhông tơƀrê.

Péa ngế xiâm xuân hlo Việt Nam - Kul pơtối mơnhông tơniăn tung tâi tâng mâu kơvâ cheăng. Tơrŭm cheăng kal kí - tơpui kâ pơtối mơdêk tâ nếo, mơhno ing péa tơdroăng péa pâ đi đo tơpui tơno tơrá khu kăn, trâm mâ tơrá mâu kăn. Tơrŭm cheăng lêng - kring tơniăn  pơtối ‘no hnoăng ki xiâm. Tơrŭm cheăng kâ pơtối cho tíu xiâm bâ eăng ƀă tê mơdró péa pâ tâk hên. Tơrŭm hnê hriâm - hnê mơjiâng tuăn ngôa rơkê, túa lĕm tro, ôm hyô, trâm tơpui tơno ƀă kuăn pơlê châ kuăn pơlê tơmâng, mơnhông mơdêk.