Ngế pro xiâm hnê ngăn tơnêi têa tối rơdêi kal ngăn tơdroăng pơtê IUU cho ‘’tơbleăng tơplâ’’ môi tiah ƀă tơmeăm ki ôh tá xê khât, kế kâ ki ôh tá xê khât, pro pơkâ troh hâi lơ 15/11/2025 thế pơtê tơdroăng kố. Mâu khu xiâm, kơvâ cheăng, kong pơlê ôh tá pêi pro tro kô tro pơxâu phâk tiô tơdroăng Pơkâ 32 dêi Khu pơkuâ hnê ngăn cheăng Đảng.

Ngế pro xiâm hnê ngăn tơnêi têa pơcháu Khu xiâm Kŏng an pơkuâ tơrŭm ƀă Khu xiâm Gâk kring tơnêi têa, Khu xiâm pơkuâ ‘na pêi chiâk deăng ƀă Kong prâi rơtế kong pơlê séa ngăn tâi tâng khu tuk hdrối hâi lơ 5/10, tơdrêng amê thế xăm tối mâu roh tơdroăng ki tơdjâk. Pôa pơkâ thế tung 5 hâi, Khu xiâm pơkuâ ‘na pêi chiâk deăng, Khu xiâm pơkuâ Kong prâi ƀă Khu xiâm hnê arak luât kêi đeăng ‘mâi rơnêu Tơdroăng pơkâ 38, mơdêk kơlo pơxâu phâk liăn. Khu râ kăn pơkuâ kal mơnhên troăng pơhlêh ing tơnăng ká xi xŏng hơngế kĭng păn ká xi xŏng, uâ mơdiê ká xi xŏng krá tơniăn.