Kơxê lơ 22/9, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh pơkuâ po rôh hôp má Môi, Khu hnê mơhno cheăng Tơnêi têa ‘na troăng hơlâ tŏng gum hngêi ối ƀă tơdroăng tê tơnêi, hngêi trăng. Ngế pro xiâm hnê ngăn tơnêi têa pơkâ thế, pêi pro nhên ai lơ ôh tơdroăng ki kuăn pơlê tơchĕng ai khât ‘na tơdroăng ki tê tơnêi, hngêi trăng vâ ‘mâi pơhlêh, malối cho athế tiâ mơnhên ti lâi yă hngêi chung cư gá kơnâ ƀă đi đo kơnâ.

Tiô tối tơbleăng a rôh hôp, tung 9 khế hdrối lâp tơnêi têa ai 1 rơpâu 816 tơdroăng tơkêa ‘na hngêi ối, kơphô̆ nếo châ tơbleăng pro. Kơxô̆ ngế troh êng roê hngêi trăng, tơnêi tung pơla hdrối nah châ a kơlo lối 430 rơpâu rôh; yă tê hngêi ối nôkố dế a kơlo kơnâ. A rôh hôp, pôa Phạm Minh Chính, Ngế pro xiâm hnê ngăn tơnêi têa tối nhên: troăng hơlâ tŏng gum hngêi ối ƀă tơdroăng tê tơnêi, hngêi trăng cho kal khât, veăng gum mơdêk liăn ngân, mơdêk ki rơkê plĕng tung tơdroăng rêh ối dêi kuăn pơlê, pro chiâng ngiâ méa nếo ăm tơnêi têa.

Ngế pro xiam hnê ngăn tơnêi têa malối tối nhên troăng hơlâ tŏng gum hngêi ối, rak vế tŭm ăm kuăn pơlê châ roê ƀă mung hngêi vâ ối, rak tơniăn hnoăng kuăn mơngế ƀă tơdroăng tơniăn ai tíu ối vâ pêi cheăng. Ngế pro xiâm hnê ngăn tơnêi têa tối nhên tơdroăng “tâi tâng xua kuăn pơlê xua tơnêi têa, khŏm mơ-eăm khât, mơ-eăm hên, pêi pro athế kơtăng, pêi cheăng ki lâi hlo cheăng ki mê, pêi cheăng ki lâi klêi cheăng ki mê; xoăng cheăng athế 6 nhên: nhên ngế, nhên cheăng, nhên hâi khế, nhên hnoăng pơkuâ, nhên hnoăng pôu râng ƀă nhên tơdroăng vâ pro chiâng rĕng, tơƀrê tung mơjiâng pro hngêi ối ƀă tơdroăng tê hngêi trăng, tơnêi tíu.