Pôa Phạm Minh Chính, Ngế pro xiâm hnê ngăn tơnêi têa  tơbleăng mơ-éa ki kal 176 pơkâ thâ rơnêu kế tơmeăm khoăng ki tơ’nhê xua kong mêi khía mơhot roh má 10 ƀă kong mêi têa kân lân lu. Troh kơhâi dế lơ 29/9, kong mêi khía mơhot hiăng pro 11 ngế hlâ, 13 ngế hía, 8 ngế ôh tá ‘nâi ối u lâi, 33 ngế tro rong, hên toăng hngêi, tíu mơjiâng tơmeăm khoăng tơ’nhê.

Ngế pro xiâm hnê ngăn tơnêi têa pơtroh rơkong khéa hơ’nêng păng ‘nâng ƀă mâu rơpŏng ai ngế trâm xía vâ ƀă pơkâ Kăn hnê ngăn Vi ƀan kuăn pơlê mâu kong pơlê, pơlê kong kơdrâm ki tơdjâk tơkŭm ti tăng tŏng xo mơngế hliăng tiâ, tŏng gum rơpŏng ai ngế trâm xía vâ, pơlât tê kơtê mơngế ki tro rong, rĕng rơnêu mâu kế tơmeăm khoăng môi tiah troăng klông, on tơhrik, têa, troăng măng.

Ngế pro xiâm hnê ngăn tơnêi têa pơkâ thế Khu xiâm pơkuâ lêng, Kŏng an ƀă mâu khu châ hnê mơhno mơhnhôk, kŏng an tơrŭm tŏng gum, tơniăn tâi tâng. Mâu khu xiâm, kơvâ cheăng, kong pơlê thế tơbleăng tơdroăng châ tơƀrê hbrâ ví  kong prâi pro ôh tá tơniăn ăm Ngế pro xiâm hnê ngăn tơnêi têa hdrối 15 chôu rêm hâi vâ tơleăng teăm tơdrêng mâu tơdroăng ki nếo ai.

Kơxo lơ 29/9, a Nghệ An, pôa Trần Hồng Hà, Phŏ Ngế pro xiâm hnê ngăn Chin phuh hiăng ai roh hôp mơ’no tơdrêng tung um tiô troăng hyôh măng ƀă mâu cheăm hnê mơhno tơdroăng rơnêu kế tơmeăm khoăng xua kong mêi khía mơhot. Tiô tơbleăng, têa lân lu dêi kong mêi khía mơhot kô pro ai mêi kân a kơpong Thanh Hóa – Hà Tĩnh, tơbăng Bắc Bộ, Phú Thọ. Nôkố tâi tâng mâu têa kroăng a 3 kong pơlê Thanh Hóa, Hà Tĩnh ƀă Ngệ An pơrá to a kơlo ki tơbleăng 3 xua mê mâu kong pơlê kal tơkŭm hbrâ ví ƀă têa kân lân lu.