Kơchơ mơđah tơbleăng kế tơmeăm Rơnó Hngê roh má I hơnăm 2025 châ tơkŭm po kân sap ing hdrối nah troh nôkố a Việt Nam, tơkŭm 2.500 khu tê mơdró, khu tơrŭm cheăng tung tơnêi têa ƀă kong têa ê. Ƀă dó inâi ‘’Tơdjêp Kuăn mơngế ƀă Pêt mơjiâng tơmeăm, Tê mơdró’’, tơdroăng tê mơdró, rôe tê tơkơdrâm phiu ro; rơpâu roh mơdró, mơ-éa môi tuăn ƀă mơ-éa chôu vế tơrŭm mơ’no liăn cheăng, hnê kŏng ngê̆ pơla mâu khu tê mơdró tung tơnêi têa ƀă khu tê mơdró Việt Nam ƀă lâp plâi tơnêi châ kĭ tơkêa, ƀă ki kơnâ tê mơdró vâ chê 5.000 rơtal liăn.

Kơchơ mơđah tơbleăng xuân hiăng chiâng leh hô̆i dêi kŏng ngê̆ tơmiât pêi rơkê ƀă khôi túa lĕm tro ngê̆ thuât, tíu mơnhên ki kơnâ xiâm: “Mơnhông cheăng kâ thế prôk ƀă mơnhông khôi túa lĕm tro, rêh ối pơlê pơla ƀă kuăn mơngế’’. Xông tơpui a Leh mơgêi, pôa Phạm Minh Chính, Ngế pro xiâm hnê ngăn tơnêi têa mơnhên Kơchơ mơđah tơbleăng kố cho môi ƀâng ki châ tơƀê mơhnhôk tơdroăng kal vâ xúa tung tơnêi têa - môi kông tơdjêp ƀeăn ƀĕng tơdjêp tơrŭm tê mơdró lâp plâi tơnêi, mơjiâng ivá mơnhông ăm kơchơ mơdró tung tơnêi têa tung chal xúa kŏng ngê̆. Ngế pro xiâm hnê ngăn tơnêi têa xuân mơnê mâu hiâm mơno lĕm, tơdroăng ki veăng gum dêi lâp pơlê pơla ƀă kuăn pơlê kơpong kong mêi têa kân lân lu ing tơdroăng ‘’Rơnó Hngêi pói tơngah’’, ƀă kơxô̆ liăn veăng tơlo lối 316 rơtal liăn.

Ngế pro xiâm hnê ngăn tơnêi têa mơnhên hiâm mơno tuăn pâ kố cho mơhno ki lĕm má môi ăm khôi túa lĕm tro vâi krâ nah ki kơnía ‘’tuăn pâ hdroâng mơngế, hiâm mơno pâ dêi pó dêi kuăn pơlê’’ dêi hdroâng mơngế pin, cho tơdroăng ki xiâm ƀă cho ivá tung pin vâ tơnêi têa kơteăng troh hơhngế ƀă krá tâ tung troăng mơnhông mơdêk.