Kơxê lơ 1/10, pôa Phạm Minh Chính, Ngế pro xiâm hnê ngăn tơnêi têa pơkuâ Roh hôp Chin phuh vâ mơnhên tơdroăng pêi pro, pơtối séa ngăn, tơpui tơno mâu troăng tah lôi pá puât, tơvâ tơvân tung tơdroăng xúa troăng pêi khu râ kăn pơkuâ 2 râ. Xông tơpui mơgêi roh hôp, pôa Phạm Minh Chính, Ngế pro xiâm hnê ngăn tơnêi têa tối nhên, hiâm mơno cho pơtối pêi kơtăng, tơdâng tơ’mô ƀă châ tơƀrê tâ; rĕng pro tơniăn mâu tơdroăng tá hâi tơtro nôkố; khu râ kăn pơkuâ 2 râ thế châ pêi cheăng tơdâng tơ’mô, môi tuăn, ƀeăn ƀĕng, tâi tâng, tơxâng tơdroăng pói vâ dêi Đảng, Tơnêi têa ƀă Kuăn pơlê.

Ngế pro xiâm hnê ngăn tơnêi têa tối, tơkŭm po khu pêi cheăng athế lĕm tro tâ khu pêi cheăng tơnêi têa ton nah; tơdroăng pro mơ-éa ăm kuăn pơlê, khu tê mơdró thế rế hía rế lĕm tro tâ, ki má lối cho tung mâu kơvâ: tơnêi tơníu, pơkâ pêi, liăn ngân, tơmeăm khoăng, mơjiâng tơmeăm khoăng, troăng klông, khăm pơlât, hnê hriâm; kêi đeăng ‘noăng chư chêh ƀă tơdjêp, tơrŭm ƀă dêi pó kơmăi pro mơ-éa cheăng kâ rêh ối ƀă tơnêi têa dêi mâu khu xiâm, kơvâ cheăng ƀă cheăm, kong pơlê.

A roh hôp Ngế pro xiâm hnê ngăn tơnêi têa tối nhên, nôkố u ối 31 rơpâu ngế pơtê cheăng tá hâi mơhá hnoăng liăn; pơkâ thế mơnhên xiâm kối inhên, tơbleăng tối tíu cheăng ki lai ai liăn, hiăng ai pơkâ mê ôh tá mơhá liăn. Ngế pro xiâm hnê ngăn tơnêi têa pơkâ thế pêi klêi tâi tâng tơdroăng mơhá liăn ăm mâu kăn ƀô̆ pơtê cheăng hdrối hâi lơ 10/10/2025.