Kơxê lơ 14/1, pôa Phạm Minh Chính, Ngế pro xiâm hnê ngăn tơnêi têa pơkuâ Roh hôp roh má tơdrốu dêi Khu hnê mơhno tơnêi têa po rơdâ pêi pro tơkêa dêi Việt Nam a Hneăng hôp COP26. Mơgêi roh hôp, Ngế pro xiâm hnê ngăn tơnêi têa mơnhên tơdroăng Việt Nam djâ mâu tơkêa ó rơdêi a COP26, tung mê ai pơkâ châ mơ’no hyôh ‘mêi lo pakong ƀă ‘’0’’ a hơnăm 2050, cho pơkâ ki tro, mơhno pôu râng hnoăng cheăng ƀă mâu kong têa lâp plâi tơnêi ƀă xua tơdroăng mơnhông krá tơniăn dêi tơnêi têa.

Ngế pro xiâm hnê ngăn tơnêi têa kheăn kơdeăn hiâm mơno hbrâ, kơtăng pêi pro ƀă mơ-eăm dêi mâu kăn ƀô̆, kơvâ cheăng, kong pơlê, khu tê mơdró ƀă kuăn pơlê tung pêi pro mâu hnoăng cheăng hiăng pơkâ mơ’no.

Tiô Ngế pro xiâm hnê ngăn tơnêi têa, pêi pro tơdroăng xiâm mơ’no hyôh ‘mêi lo pakong ƀă ‘’0’’ cho pơloăng mơnúa kân laga tơdrêng amê xuân po roh tơ’lêi hlâu vâ pro pơhlêh tơdroăng cheăng kâ tiô troăng ngiât, krá tơniăn, mơdêk tơdroăng ki tơniăn krê, pơkuâ dêi hnoăng cheăng ƀă ivá tơbriât cheăng.

Hbrâ ví kong prâi pro pơhlêh cho hnoăng pêi ki pơklât thế pêi pro, tung mê, kuăn pơlê ƀă khu tê mơdró rế cho tíu xiâm, rế cho khu ki xiâm, tơdrêng veăng ƀă pêi pro tŭm hnoăng dêi tơná.