Xông tơpui a Rôh hôp, pôa Lê Minh Hưng, Ngế pro xiâm hnê ngăn tơnêi têa mơnhên, tơdroăng cheăng kâ dế chiu trâm kân ing pơkâ pơhlêh nếo troăng pêi tơtêk ƀă pơkuâ liăn chu rơpâ yă. Xua mê, mâu khu xiâm, kơvâ cheăng, kong pơlê kal pơtối hbrâ, kơtăng pêi pro mâu troăng tah lôi pá puât, mơdêk pêt mơjiâng tơmeăm, tê mơdró ƀă mơ’no liăn cheăng tơnêi têa.

Tiô tơbleăng, tung 8 khế hiăng hluâ, xo hnoăng liăn ngân Tơnêi têa châ lối 2 rơtuh rơtal liăn; dâng 209 rơpâu rơtal liăn hnoăng mơhá, kơxô̆ liăn châ ăm tê kơtê, kơdroh, pơkâ hâi khế ăm kuăn pơlê ƀă khu tê mơdró. Mơ’no liăn cheăng tơnêi têa châ 49% pơkâ pêi; kơxô̆ liăn FDI kĭ châ lối 40 rơtal dollars, tâk 55% tâng pơchông ƀă rôh kố hơnăm nah. Tâi tâng pêi lo liăn tê rôe tơmeăm ngi kong têa châ dâng 770 rơtal dollars.

Pôa Lê Minh Hưng, Ngế pro xiâm hnê ngăn tơnêi têa pơkâ pơtối rak krá pơkuâ liăn chu rơpâ yă, rak krá tơniăn cheăng kâ kân, mơjiâng xiâm kối mơdêk tung mâu khế mơ’nui hơnăm. Mâu kơvâ cheăng Chin phuh tơkŭm lêi tah tíu ki kreăng, mơdêk mâu tơdroăng ki vâ tơtêk, mơ-eăm pêi kêi đeăng mâu pơkâ mơnhông cheăng kâ – rêh ối pơlê pơla hơnăm 2026.