VOV4.XơĐăng - Pôa Phạm Minh Chính, Ngế pro xiâm hnê ngăn Chin phuh nếo kĭ Mơ-éa ki kal ‘na tơdroăng thâ pâk vaccine ƀă thăm pêi pro mâu troăng hbrâ mơdât COVID-19. Tung mơ-éa ki kal tối nhên: Drêng pơreăng COVID-19 xông tâ tú ó a pơlê kong kân Hà Nội ƀă mâu kong pơlê, ki má lối cho roh tơ’lêi xông tâ tú dêi pơreăng nếo Omicron, vâ pơtối pêi pro châ tơƀrê mâu troăng hbrâ, mơdât pơreăng, ki má lối cho a roh Têt Nhâm Dần,

Ngế pro xiâm hnê ngăn Chin phuh pơkâ Kăn pơkuâ hnê mơhno hbrâ, mơdât pơreăng COVID-19, Kăn hnê ngăn Vi ƀan kong pơlê, pơlê kong kơdrâm ối tung Khu xiâm tơkŭm hnê mơhno pêi pro kơtăng mâu troăng hbrâ, mơdât pơreăng tiô tro mâu hnê mơhno dêi Chin phuh, Ngế pro xiâm hnê ngăn Chin phuh, Khu hnê mơhno Tơnêi têa hbrâ mơdât pơreăng COVID-19, ki má lối cho troăng hbrâ mơdât 5K ƀă ki rơhêng vâ tối cho mơdêk hlê plĕng kuăn pơlê rak vế ivá ăm tơná, ăm rơpŏng tơná, ăm pơlê pơla ƀă mâu troăng hbrâ mơdât pơreăng nếo Omicron, ôh tá chiâng tơngôu, thế kơchăng; thăm pêi pro tơdroăng pơlât a hngêi tiô hnê mơhno nhên, krá tơniăn dêi Khu xiâm pơkuâ ngăn pơkeăng ƀă khăm pơlât ƀă mơngế tro tâ COVID-19 ôh tá bê râ ƀă ôh tá mơhno tơdroăng châi pakong.

A Sa Ly tơplôu ƀă tơbleăng