VOV4.Xơ Đăng - Kơxo lơ 24/3, pôa Phạm Minh Chính, Ngế pro xiâm hnê ngăn Chin phuh pơkuâ hôp mơ’no tơdrêng tung troăng hyôh Internet lâp tơnêi têa ƀă khu mơdró tơnêi têa ‘na tơdroăng “Pơtối pơ’lêh nếo’’, mơdêk tơ-brê tơdroăng cheăng vâ mơhnhôk tăng dêi khu mơdró tơnêi têa tung mơnhông mơdêk cheăng kâ rêh ối - pơlê pơla”. Tơbleăng a hneăng hôp, Ngế pro xiâm hnê ngăn tơnêi têa tối nhên, Hneăng hôp po tung pơla tơnêi têa dế pêi pro Tơdroăng ‘mâi mơnhông cheăng kâ tiô mâu pơkâ dêi Đảng, Kuô̆k hô̆i ƀă Chin phuh.

Tâi tâng a Hneăng hôp

Chin phuh hiăng ƀă dế pêi tơ-brê troăng rơhlâ pơkâ “hmâ tơniăn, rơkê ƀeăn, kâi mơdât pơreăng COVID- 19’’, pro xiâm ‘mâi mơnhông mơdêk rĕng krá tơniăn cheăng kâ rêh ối. Chin phuh pơkâ khu mơdró tơnêi têa rak ki xiâm ƀă cho môi khu ki kal dêi tơdroăng cheăng kâ tơnêi têa, veăng ‘no hnoăng ki kal tơniăn tung cheăng kâ kân ƀă mơnhông mơdêk cheăng kâ rêh ối.

Pakĭng mê, Ngế pro xiâm hnê ngăn tơnêi têa pơchân, Chin phuh kal tơpui  tơbleăng  mâu pơkâ, tơdroăng cheăng , troăng rơhlâ pêi thế nhên ăm tơrêm khu, kơvâ cheăng ƀă kong pơlê, tơrêm khu, khu xiâm dêi kŏng ti, khu mơdró tơnêi têa vâ hlê plĕng tro, troăng rơhlâ pêi tro ƀă pêi tơ-ƀrê tâ.

Gương tơplôu ƀă tơbleăng