VOV4.Xơ Đăng - Kơxo lơ 21/3, a Tíu kăn xiâm hnê ngăn tơnêi têa, pôa Phạm Minh Chính, Ngế pro xiâm hnê ngăn tơnêi têa hiăng pơkuâ leh tơdah pôa Dato’ Sri Ismail Sabri bin Yaakob, Ngế pro xiâm hnê ngăn kong têa Malaysia lăm pôu pêi cheăng a Việt Nam. Roh lăm pôu pêi cheăng Việt Nam dêi Ngế pro xiâm hnê ngăn kong têa Malaysia tơkŭm po tung pơla tơrŭm cheăng tiô khôi vâi krâ nah ƀă Tơrŭm ton xŏn pơla Việt Nam – Malaysia dế mơnhông mơdêk lĕm.

Tâ tá rôh hôp

Péa tơnêi têa dế tơmiât troh leh tơbâ 50 hơnăm mơjiâng tơrŭm tơpui kâ (1973 - 2023). Klêi kơ’nâi leh tơdah, pôa Phạm Minh Chính ƀă Ngế pro xiâm hnê ngăn kong têa Malaysia hiăng rơtế tơpui tơno ƀă ngăn kĭ tơkêa mơ-éa ki kal pơla péa tơnêi têa. Roh lăm pôu pêi cheăng vâ thăm tơrŭm cheăng tâ mê nếo pơla péa pâ, mơdêk ivá tŭm têk dêi péa tơnêi têa tung tơrŭm cheăng klêi kơ’nâi pơreăng COVID-19.

Tơdrêng amê, kố cho roh vâ péa pâ châ hlo mâu tơdroăng nếo diê tơrŭm cheăng pơla péa pâ; tơpui tơno ‘na mâu tơdroăng kơpong ƀă lâp plâi tơnêi ki péa pâ rơtế tơmâng; thăm pêi pro tơdroăng tê mơdró, mơ’no liăn cheăng pơla péa tơnêi têa.

A Sa Ly tơplôu ƀă tơbleăng