Tiô tối tơbleăng dêi Khu xiâm ngăn liăn ngân, tơdroăng cheăng kâ rêh ối pơlê pơla 2 khế châ tơƀrê hên, tơniăn tâ khế hdrối ƀă rơtế khế kố hơnăm hdrối; kuăn pơlê, khu mơdró, khu ‘no liăn cheăng tung tơnêi têa ƀă kong têa ê, mâu troăng hơlâ pơkâ tŏng gum liăn ngân, tơkŭm po pơxá tíu ối tơdroăng loi dêi kong têa ê rế hên tung tơdroăng loi tơngah a tơdroăng cheăng kâ. Nâp liăn tơnêi têa châ 25,4% tiô pơkâ nâp liăn, tâk 25,7% tâng vâ pơchông ƀă khế kố hơnăm nah. Kơxô̆ liăn châ xo ing tê tơmeăm ngi kong têa ê 2 khế tâk 12% tâng vâ pơchông ƀă khế kố hơnăm nah.

A rôh hôp, mâu ngế cheăng tung Chin phuh hiăng ăm rơkong veăng tơpui vâ mơnhên tối ‘na cheăng kâ rêh ối pơlê pơla khế 2 ƀă 2 khế; mâu tơdroăng ki xiâm vâ pêi dêi tơnêi; tơdroăng ‘no liăn pêi cheăng tơdjuôm. Ngế pro xiâm hnê ngăn tơnêi têa pơkâ thế mâu kăn pâ thế tŏng gum mâu tơdroăng kal tung pơkuâ, hnê mơhno la ngiâ vâ hơnăm 2025 athế tâk iâ hlái 8%, veăng gum pêi pro ƀlêi chiâng Túa pơkâ mơnhông cheăng kâ rêh ối pơlê pơla 5 hơnăm 2021 – 2025, pro ivá mơ-eăm nếo vâ tơnêi têa krá tơniăn mot tung chal nếo, chal mơ-eăm tơná, mơjiâng tơnêi têa kro rơdêi, rơkê, kuăn pơlê phâi hơtôu hơniâp ro.