Teăng mâ khu râ kăn pơkuâ Chin phuh, pôa Phạm Minh Chính, Ngế pro xiâm hnê ngăn tơnêi têa kheăn kơdeăn mâu tơdroăng mơ-eăm, ki kơdô mơ-eăm ƀă tơdroăng châ tơƀrê dêi mâu khu xiâm, kơvâ cheăng, kong pơlê; tơdroăng hnê mơhno kơtăng dêi mâu ngế cheăng tung Khu hnê mơhno dêi Chin phuh; veăng kum kal khât tung khu Kŏng an kuăn pơlê; tơdroăng môi hiâm mơno, tŏng gum, veăng hên dêi kuăn pơlê, khu tê mơdró.

Ngế pro xiâm hnê ngăn tơnêi têa tối rơdêi, hnoăng cheăng tung la ngiâ cho hngăm ‘nâng. ‘Na troăng tơmiât hnê mơhno Ngế pro xiâm hnê ngăn tơnêi têa tối nhên, pơla khoa hok kŏng ngê̆ ƀă pơhlêh nếo tơmiêt pêi rơkê, pơhlêh xúa kŏng ngê̆ thăm krá rơdêi, achê ƀă dêi pó, pơhlêh nếo pro mơ-éa tơnêi têa ƀă ‘măn kuăn mơngế cho ki xiâm; Mơnhông khoa hok, kŏng ngê̆, pơhlêh nếo tơmiât pêi rơkê, pơhlêh xúa kŏng ngê̆ ƀă Tơdroăng tơkêa bro 06 cho pơkâ ôh tá tơdjâk pakong, cho tơdroăng rah xo pêi cheăng ton xŏn, cho kơjo má môi.

Ngế pro xiâm hnê ngăn tơnêi têa pơkâ, mâu kong pơlê thâ pêi kêi đeăng chêh mơ-éa tung kơmăi vi tĭnh mơ-éa rêm tơdroăng pơ’leăng mơngế, mơ-éa ‘na tơnêi tơníu, hbrâ hriăn plĕng troăng vêh xúa ‘noăng chư chêh tung kŏng ngê̆ vâ pêi pro tơ’lêi hlâu ƀă 200 mơ-éa tơnêi têa tiô hnoăng pơkuâ tơnêi têa.