VOV4.Xơ Đăng - Kơxê lơ 6/2, pơtối tơdroăng séa ngăn, mơhnhôk mâu tơdroăng tơkêa bro ki xiâm kơvâ troăng klông, pôa Phạm Minh Chính, Ngế pro xiâm hnê ngăn tơnêi têa hiăng séa ngăn, mơhnhôk thế, ‘nâi nhên tơdroăng, tah lôi mâu tơdroăng pá puât, pơloăng mơnúa ƀă mơhnhôk, rơkâu Têt khu kăn ƀô̆, kŏng nhân dế pêi cheăng a kŏng trương dế mơjiâng pro troăng kân ăm phêp rơxế kơtâu têi Mỹ Thuận – Cần Thơ ƀă tơdroăng tơkêa bro kông Mỹ Thuận 2.

Troăng kân ăm phêp rơxế kơtâu têi Mỹ Thuận – Cần Thơ prôk tơkâ hluâ 2 kong pơlê Vĩnh Long, Đồng Tháp. Klêi kơ’nâi troăng kân ăm phêp rơxế kơtâu têi kố kêi đeăng, ƀă troăng kân Pơlê kong kân Hồ Chí Minh – Trung Lương, Trung Lương – Mỹ Thuận ƀă kông Mỹ Thuận 2, mơjiâng chiâng troăng kân ăm phêp rơxế kơtâu têi kêi đeăng tâi tâng ing pơlê kong kân Hồ Chí Minh – Cần Thơ, kum kơdroh chôm drô troăng kân, kơdroh tơklâm rơxế a troăng kân lăm ngi kong pơlê ki ê kơxô̆ 1.

Akố, Ngế pro xiâm hnê ngăn tơnêi têa pơkâ thế kong pơlê Vĩnh Long ƀă kong pơlê Đồng Tháp thâ pêi kêi đeăng tơdroăng tăng tơnêi vâ mơjiâng pro troăng kân; rêm pâ ki tơdjâk tơrŭm krá tơniăn vâ mơdêk tơdroăng mơjiâng pro 3 khế ƀă mơdêk ki dâi lĕm. Ngế pro xiâm hnê ngăn tơnêi têa pa môi xôh nếo pơchân tối troh tơdroăng pêi pro mâu troăng kân ki ăm phêp rơxế kơtâu têi kal tiô troăng tơdrăng má môi, ‘nâng ‘nâi má môi tiô ki chiâng; Tơdrêng amê, mâu kong pơlê pơtối mơ-eăm xêh, pêi cheăng rơdêi tâ, mơ’no liăn tro tơdroăng, tro tơmeăm ki vâ mơjiâng, ôh tá tơkôm, kơnôm to a Tơnêi têa tung tơdroăng mơjiâng mâu troăng kân ăm phêp rơxế kơtâu têi.

A Sa Ly tơplôu ƀă tơbleăng