A rôh tơdah, pôa Phạm Minh Chính, Ngế pro xiâm hnê ngăn tơnêi tối nhên, Việt Nam đi đo nhoăm ƀă púi vâ ôh tá la lai pơtê mơnhông tơbrê tơrŭm cheăng tiah hmâ ing nah ƀă Khu tơrŭm cheăng tŭm tơdroăng dêi kong têa Rusi. Ngế pro xiâm hnê ngăn tơnêi  khĕn kơdeăn khât tơdroăng cheăng dêi Grup hiăng mơnhông rĕng ƀă teăm pêi cheăng ƀă mâu grup, khu mơdró rơdêi péa pâ tơrŭm krá kak, ai pơxúa tơbrê vâ mơhno ki pêi tro tơdroăng tơhrâ dêi mâu kăn xiâm.

Mơnê pôa Phạm Minh Chính, Ngế pro xiâm hnê ngăn tơnêi  hiăng mơdoh chôu tơdah pôa Vladimir Petrovich Evtushenkov ăm ‘nâi AFK Sistema cho grup pêi cheăng krê dêi kuăn pơlê ki kro mơdróng kân má môi kong têa Rusi ai dâng 300 rơpâu ngế pêi cheăng, tê mơdró hên kơvâ cheăng: ‘na hyôh phôn, ‘na cheăng kơxô̆, kŏng ngê̆ ki dâi lĕm, tê mơdró điê̆n tưh, ‘na pơkeăng pơlât, kơmăi uâ loăng pro tơmeăm ƀă loăng ƀă pro hngêi ƀă loăng, pêi chiâk, pro pơkeăng, mơdró tíu kâ ối pơtê ƀă hên ki ê...

Pôa tối kô mơ-eăm mơdêk tơrŭm cheăng ƀă peăng Việt Nam tung mâu kơvâ cheăng ki Ngế pro xiâm hnê ngăn tơnêi têa hiăng hnê mơhno: hbrâ vâ pêi cheăng ƀă kơmăi kơmok, hnê mâu ngế pêi cheăng rơkê ăm peăng Việt Nam vâ pro pơxúa ƀă ai pơxúa ton ta ah ăm tŭm péa pâ.