Ngế pro xiâm hnê ngăn tơnêi têa khĕn kơdeăn mâu tơdroăng veăng gum hên kơnía git dêi mâu Kăn teăng mâ, Ngế ối a ko kơ koan teăng mâ tơpui kâ ƀă kong têa ê ƀă mâu Kăn teăng mâ tung mơnhông tơrŭm cheăng pơla Việt Nam ƀă mâu kong têa ASEAN. Ngế pro xiâm hnê ngăn tơnêi têa tối nhên Việt Nam đi đo ngăn nhuô̆m ƀă kơjo má môi ăm tơrŭm cheăng ƀă mâu kong têa ki achê; tơhrâ pơtối veăng kơhnâ, veăng gum hbrâ rơnáu, ai pơxúa tâ nếo ăm tơrŭm cheăng ASEAN.

Ngế pro xiâm hnê ngăn tơnêi têa pơkâ thế mâu Kăn teăng mâ, Kăn xiâm teăng mâ pơtối veăng gum ai pơxúa ăm tơdroăng mơnhông rơdêi dêi tơrŭm cheăng pơla Việt Nam ƀă mâu kong têa ASEAN tung la ngiâ. Pơkâ thế ASEAN mơ-eăm pro trâu hơngế tâ nếo tơrŭm tê mơdró 'no liăn cheăng tung khu, xúa châ tơƀrê mâu ivá mơdêk nếo môi tiah cheăng kâ xúa măng internet, khoa hok kŏng kơmăi vi tĭnh, pơhlêh nếo tơmiât pêi rơkê, thăm tơdjêp tung mâu kơvâ cheăng ton xŏn môi tiah hngêi trăng, troăng klông, on tơhrik...; mơdêk tơrŭm cheăng tiô khôi vâi krâ nah, mơdêk trâm mâ kuăn pơlê, tơrŭm; tơdroăng mơjiâng Khu tơrŭm ASEAN tâi tâng ƀă krá tơniăn, xo ki pơxúa dêi kuăn pơlê pro xiâm ăm rêm troăng hơlâ, tơdroăng tơrŭm cheăng.