VOV4.Xơ Đăng - Kơxo lơ 8/3,Liên doân tê mơdró ƀă kơmăi kơmok Việt Nam, Khu tơrŭm tê mơdró Mih a Hà Nội ƀă Ƀơrô tê mơdró Mih a Washington rơtế tơkŭm po hneăng hôp khu râ kăn xiâm Tê mơdró Việt Nam – Mih hơnăm 2022 a Hà Nội tiô troăng mơ’no tơdrêng tung um tiô troăng măng Internet hlối hôp tơdrêng. Pôa Phạm Minh Chính, Ngế pro xiâm hnê ngăn Chin phuh veăng ƀă xông tơpui hnê mơhno a Hneăng hôp.

Ngế pro xiâm hnê ngăn tơnêi têa veăng Hneăng hôp khu râ kăn xiâm tê mơdró Việt Nam – Mih hơnăm 2022

Xông tơpui a hneăng hôp, pôa Phạm Minh Chính mơnhên, troăng hơlâ pêi đi đo dêi Việt Nam đi đo ngăn Mih cho môi tung mâu khu tơrŭm cheăng ki kal má môi. Ngế pro xiâm hnê ngăn tơnêi têa tối nhên, Chin phuh Việt Nam tơkêa kô pro tơ’lêi hlâu vâ mâu khu tê mơdró Mih mơ’no liăn, tê mơdró châ tơƀrê a Việt Nam, ki má lối cho tung mâu kơvâ ki Mih ai tơmeăm vâ mơnhông rơdêi ƀă Việt Nam dế pói vâ mơnhông mơdêk môi tiah: on tơhrik ki vêh pro, on tơhrik krúa lĕm ƀă krá tơniăn, hngêi trăng troăng klông, liăn ngân hngêi arak liăn, hnê hriâm hnê mơjiâng, ôm hyô, kơmăi kơmok rơxông nếo, pêi chiâk deăng xúa kơmăi kơmok rơxông nếo.

A Sa Ly tơplôu ƀă tơbleăng