VOV4.Xơ Đăng - Kơxo lơ 10/3, a Hngêi hôp kân Tơnêi têa, pơlê kong xiâm Hà Nội, Hneăng hôp khu vâi kơdrâi tung lâp tơnêi têa roh má 13, hneăng hơnăm 2022-2027 hiăng po ƀă ai 959 ngế kăn, teăng mâ ăm mâu râ vâi kơdrâi tung lâp tơnêi têa. Pôa Phạm Minh Chính, Ngế cheăng tung khu xiâm kal kí, Ngế pro xiâm hnê ngăn chin phuh veăng leh ki pơxiâm po. Tơbleăng a hneăng hôp, pôa Phạm Minh chính tối nhên, tung plâ mâu hơnăm mơjiâng ƀă rak vế tơnêi têa, mơhé ulâi, hmôu vâ tung pơla pá puât lơ ôh, ƀă troăng rơhlâ tơná, tuăn mơ-eăm, tơnôu, tuăn hiâm lĕm, ‘nâi mơ-eăm troh tui lui ƀă ‘nâi mơ-eăm mơnhông tơ-ƀrê, vâi kơdrâi Việt Nam hiăng tơkâ luâ tŭm tơdroăng pá pơloăng mơnúa, veăng ‘no hnoăng kân, veăng mơjiâng ƀă kring vế tơnêi têa  Việt Nam krá kak.

Pôa Phạm Minh Chính, Ngế cheăng tung khu xiâm kal kí, Ngế pro xiâm hnê ngăn chin phuh veăng leh ki pơxiâm po

Vâ chiâng pêi pro mâu tơdroăng pơkâ mơnhông tơnêi têa tung la ngiâ, Ngế pro xiâm hnê ngăn tơnêi têa pâ thế, kal pơtối rak vế ki rơdêi tung tơrŭm môi tuăn dêi hdroâng mơngế, tung mê ai hnoăng pêi ki kal dêi vâi kơdrâi. Ngế pro xiâm hnê ngăn tơnêi têa môi tuăn ƀă troăng rơhlâ, cheăng pêi hneăng hơnăm 2022-2027, mâu tơdroăng pơkâ vâ pêi, mâu tơdroăng cheăng pêi ki tơ-ƀrê ƀă tơdroăng cheăng pêi ki kal hiăng tơbleăng tối a hneăng hôp.

Gương tơplôu ƀă tơbleăng