VOV4.Xơ Đăng - Kơxê lơ 10/2, a Hà Nội, pôa Phạm Minh Chính, Ngế pro xiâm hnê ngăn Chin phuh veăng ƀă xông tơpui hnê mơhno a Leh tơbleăng tơdroăng ivá hok tro hneăng hơnăm 2021 – 2025 châ tơkŭm po mơ’no tơdrêng tung um tiô troăng măng internet ing Tíu xiâm Hneăng hôp lâp tơnêi têa Hà Nội ƀă 63 kong pơlê, pơlê kong kơdrâm ƀă tơdjêp troh 41.950 hngêi trung tung lâp tơnêi têa.

Rơtế ƀă tơdroăng vêh lôu péa hngêi trung hriâm tung lâp tơnêi têa, kố cho tơdroăng ki kal, mơnhên tơdroăng khŏm mơ-eăm kân dêi Đảng ƀă Tơnêi têa tung tơdroăng mơdêk ki châ tơƀrê hôm tung tơdroăng rak ngăn, gâk kring vâi hdrêng, hok tro. Tơdroăng ivá hok tro a hngêi trung hneăng hơnăm 2021 – 2025 mơnhên 5 khu tơdroăng xiâm ƀă 7 khu troăng rak ngăn, gak kring ƀă pơkuâ ngăn ivá, vâi hdrêng, hok tro; hnê hriâm pơtâp ivá châ chăn ƀă mâu tơdroăng tơ’noăng ivá a hngêi trung; tơkŭm po roh kâ hmê a hngêi trung, tơniăn trếo piê kơhiâm tơtro; thăm xúa kŏng ngê̆ thông tin tung pơkuâ, séa ngăn, riân mơnhên, tơbleăng; pơtâng tối, hnê hriâm ivá hok tro tung hngêi trung.

Xông tơpui akố, pôa Phạm Minh Chính pơcháu hnoăng cheăng ăm mâu khu xiâm, kơ koan, kong pơlê, tơdrêng amê mơhnhôk tơdroăng ki veăng dêi mâu khu tơrŭm cheăng, pêi pro tơdrêng ƀă mâu tơdroăng tơkêa bro, tơdroăng pơkâ pêi tơdjâk vâ thăm pêi pro tơdroăng rak ngăn ivá tŭm têk, tơdâng tơ’mô ‘na châ, hiâm mơno ăm vâi hdrêng, hok tro.

A Sa Ly tơplôu ƀă tơbleăng