VOV4.Xơ Đăng - Kơxo lơ  (12/1), pôa Phạm Minh Chính, Ngế pro xiâm hnê ngăn Chin phuh hiăng veăng hôp hnê mơhno mơgêi hneăng hôp tơpui tơdroăng cheăng tung hơnăm 2021, ƀă tơbleăng tơdroăng cheăng pêi tung hơnăm 2022 dêi kơvâ cheăng ngăn mâu ngế pêi cheăng, Xua khu xiâm ngăn mâu kăn bô̆ mâu ngế pêi cheăng tơkŭm hôp mơ’no tiô troăng hyôh Internet ƀă 63 to kong pơlê, pơlê kong kân.

Tơbleăng a hneăng hôp, pôa Phạm Minh Chính, Ngế pro xiâm hnê ngăn tơnêi têa khĕn kơdeăn mâu tơdroăng hiăng pêi pro dêi kơvâ cheăng ngăn kăn ƀô̆ hiăng châ pêi pro tung hơnăm 2021, veăng mơdêk ki kal a tơdroăng mơnhông cheăng kâ tơchoâm dêi tơnêi têa.

Ngế pro xiâm hnê ngăn tơnêi têa veăng mơgêi hneăng hôp kơvâ cheăng ngăn ‘na kăn ƀô̆ hơnăm 2021

Pakĭng mê, Ngế pro xiâm hnê ngăn tơnêi têa xuân tối nhên mâu tơdroăng ki u ối ƀă ki tơvâ tơvân dêi kơvâ cheăng ngăn kăn ƀô̆ môi tiah tơdroăng pơkâ luât, luât tŏng kum ki hiăng ai la hâi tro tiô kal vâ, kal thế pêi tro tiô pơkâ. Tung la ngiâ, Ngế pro xiâm hnê ngăn tơnêi têa pơkâ thế, pơ’lêh nếo ƀă pê klêi luât pơkâ ‘na rak ngăn kăn bô̆, mâu ngế pơkuâ kơ koan, mâu ngế cheăng a kơ koan vâ tơniăn tơdâng tơ’mô, môi tuăn tung khu cheăng kal kí ƀă mơjiâng luât hriâm tơ’nôm ăm mâu kăn ƀô̆, mâu ngế pơkuâ kơkoan, mâu kăn râ cheăm ƀă tơring, kong pơlê. Tí tăng ‘nâi plĕng vâ tơdroăng xing xoăng kuăn mơngế cheăng, xoăng tơ-tro ƀă tơdroăng cheăng nếo nôkố.

Gương tơplôu ƀă tơbleăng