VOV4.Xơ Đăng - Kơxê lơ 10/1, pôa Phạm Minh Chính, Ngế pro xiâm hnê ngăn Chin phuh Việt Nam ƀă pôa Phankham Viphavanh, Ngế pro xiâm hnê ngăn Chin phuh kong têa Lếo trâm mâ khu tê mơdró péa tơnêi têa. A roh trâm mâ ƀă khu râ kăn pơkuâ péa tơnêi têa, kăn teăng mâ mâu khu tê mơdró kân dêi Việt Nam ƀă Lếo mơnhên troăng tơmiât tơrŭm cheăng mơ’no liăn ton xŏn, krá tơniăn, tối hên tơdroăng pơkâ, pâ thế ƀă Chin phuh ƀă mâu khu xiâm, kơvâ cheăng péa tơnêi têa.

Ngế pro xiâm hnê ngăn tơnêi têa Việt Nam ƀă Ngế pro xiâm hnê ngăn kong têa Lếo trâm mâ khu tê mơdró péa tơnêi têa

Mâu khu tê mơdró tối mâu tơdroăng mơ-eăm rĕng pêi kêi đeăng mâu tơdroăng tơkêa bro kân, kal dế châ pêi pro vâ mơnhông tung tơrŭm cheăng kâ pơla péa tơnêi têa. Xông tơpui a roh trâm mâ, pôa Phạm Minh Chính pơkâ mâu Khu xiâm, kơvâ cheăng, kong pơlê ƀă khu tê mơdró péa tơnêi têa thăm tơdjêp, tŏng kum pơla péa tơdroăng cheăng kâ Việt Nam – Lếo xiâm kối cho troăng pơkâ pêi, liăn ngân, hngêi trăng, troăng klông, on tơhrik, kŏng ngê̆ pơtroh tơdroăng kal, ôm hyô, tơrŭm pái tơdroăng cheăng kâ Việt Nam - Lếo – Kul ƀă mâu kong têa ki ê tung kơpong.

A Sa Ly tơplôu ƀă tơbleăng