Ngế xiâm pơkuâ cheăng Tơnêi têa veăng ai mâ a rôh pơxiâm pro “Hneăng cheăng Quang Trung” a Lâm Đồng
Thứ ba, 05:00, 16/12/2025
Tơplôu: Katarina Nga/VOV Tây Nguyên
Tơplôu: Katarina Nga/VOV Tây Nguyên
VOV.Xơ Đăng - Kơxo lơ 15/12, Ngế xiâm pơkuâ Cheăng Tơnêi têa Phan Đình Trạc veăng ai mâ a leh pơxiâm po tơdroăng Tơplâ Quang Trung a cheăm Hàm Thuận Bắc, kong pơlê Lâm Đồng (tơring Hàm Thuận Bắc, kong pơlê Bình Thuận hdrối nah).
Pêi pro tơdroăng tơplâ Quang Trung ƀă tơdroăng pêi pro kơtăng rĕng, kong pơlê Lâm Đồng hiăng tơkŭm po pơxiâm pro 6 toăng hngêi ăm mâu rơpŏng kuăn pơlê ki ai hngêi tro tơhnâp tơ’nhiê tung rôh kong mê khía mơhot têa kân lân lu khế 12 a cheăm Hàm Thuận Bắc.
Tơpui hnê mơhno, pôa Y Thanh Hà Niê Kdăm, Kăn pơkuâ ngăn Đảng tối nhên, tơdroăng ki ‘mâi pro hngêi ối cho hnoăng cheăng ki kal pêi tơdrêng ƀă rơkê plĕng, mơhno tơdroăng ki tơmâng ngăn trâu rơdâ dêi Đảng ƀă Tơnêi têa. Kăn pơkuâ ngăn Đảng pơkâ thế mâu tíu pêi cheăng ki pro athế pro ƀă hiâm mơno pro rĕng ƀă pôu râng dêi hnoăng. Pơkâ pêi cho hrá má môi troh tơdế khế 1/2026, mâu toăng hngêi athế pro klêi, dâi krá vâ kuăn pơlê ai hngêi nếo tơdah Têt Lo hơnăm nếo Bính Ngọ.
Viết bình luận