Ai 2 ngế kuăn dế hriâm mauh yăo, rêm khế, rơpŏng nâ Nguyễn Ngọc Quỳnh ối a tơring Nam Đàn, kong pơlê Nghệ An athế nâp dâng 4 rơtuh liăn hriâm ƀă kâ hmê kơhâi dế ăm dêi prế kuăn. On veăng nâ pơrá pro kŏng nhân, tơdroăng kâ liăn khế ôh tá tơniăn mê rêm khế athế kơdĭng vâ khoh ai kơxô̆ liăn nâp ăm kuăn ‘nĕng i hriâm, kâ hmê a hngêi trung. Xua tiah mê, drêng tâng tối kuăn ‘nĕng hriâm mầm non ƀă hok tro ing lâm 1 troh a lâm 12, tâng hriâm a hngêi trng dêi tơnêi têa mê kô ôh tá eâ nâp liăn hriâm xếo ing khế 9 hơnăm kố ah, nâ tâ ro tung hiâm mơno xua kô kơdroh iâ kơxô̆ liăn ki gum ăm 2 ngế kuăn hriâm a hngêi trung:

“Môi tiah rơpŏng á o kố, má kơnốu á pơrá lăm pêi cheăng kâ híu tăng liăn ngân rêm hâi, má hiăng ai 2 ngế kuăn, tâng châ gum ôh tá nâp liăn hriâm ăm kuăn ‘nĕng mê on veăng má chía kơdroh iâ ki xahpá ‘na liăn ngân, xua mê, á tâ ro ‘nâng drêng ai troăng hơlâ tŏng gum kố dêi tơnêi têa”.

Hơniâp ro xuân cho tơdroăng ki phiu niu tơdjuôm tâi tâng mâu nôu pâ ki ai kuăn ‘nĕng dế hriâm a hngêi trung, drêng ai tơdroăng pơkâ ki nếo ‘na ôh tá thế nâp liăn hriâm ăm mâu vâi muăn, vâi o hriâm ing râ mầm non troh a lâm 12, cho mâu hngêi trung xua tơnêi têa mơjiâng ƀă pơkuâ ngăn, kố cho tơdroăng ki nếo pơkâ pro dêi Khu xiâm ngăn cheăng kal kí. Nâ Nguyễn Thị Hương, ối a bêng Đồng Tâm, pơlê krâm Hai Bà Trưng, Hà Nội ai tối tiah kố:

“Rơpŏng á ai 2 ngế kuăn, 1 ngế hriâm râ má péa, môi ngế hriâm lâm 10. Drêng mot hơnăm hriâm nếo kố ah, châ gum, ôh tá eâ nâp liăn hriâm á ro ó păng ‘nâng. Maluâ liăn nâp rêm khế ăm prế kuăn mê tung 1 khế ôh tá ‘nhó hên to lâi, la ƀă tơdroăng ki rêh kâ ối a Hà Nội ga xuân hrê hên liăn ngân, rơpŏng á dế lăm mung rêh ối tung hngêi vâi, drêng tâng tối ôh tá eâ nâp liăn hriâm ăm kuăn ‘nĕng mê rơpŏng á xuân chía kơdroh iâ ki xahpá ăm dêi kuăn ‘nĕng”.

Nâ Ngô Thị Mai ối a tơring Thạch Thất, Hà Nội tối tiah kố:

“Á xuân ro há. Xua châ kơdroh iâ kơxô̆ liăn ki hrê nâp liăn ăm kuăn ‘nĕng, tâng riân ngăn tung 1 hơnăm hriâm dêi kuăn ‘nĕng, ga xuân hên ‘nâng. Klêi kơ’nâi ing ôh tá nâp liăn hriâm ah xếo, mê rơpŏng á kô xo kơxô̆ liăn ki mê vâ pêi pro tơdroăng ki ê, xuân gum ăm dêi kuăn ‘nĕng dế hriâm. Tâng vâ riân ngăn, rêh ối, pêi cheăng a thôn pơlê hơngế hơngo môi tiah ngin kố tơdroăng ki pêi lo liăn ngân ga iâ ó ‘nâng, xua mê, ƀă kơxô̆ liăn ki ôh tá eâ nâp ăm hngêi trung mê ƀă ngin cho ai pơxúa păng ‘nâng”.

Tơdrêng ƀă tơdroăng ki pơkâ ôh tá eâ nâp liăn hriâm xếo ăm tâi tâng hok tro ing mầm non troh a lâm 12 ki hriâm a mâu hngêi trung dêi tơnêi têa, mâu hok tro ki hriâm hngêi trung krê, hngêi trung pá kong xuân châ hbru gum teăng kơxô̆ liăn dêi hngêi trung tơnêi têa tiô luât tơnêi têa pơkâ; ki hên lơ iâ liăn nâp hriâm pơla hngêi trung dêi tơnêi têa ƀă hngêi trung krê pa kong xua tơná rơpŏng hngêi, nôu pâ ki ai kuăn ‘nĕng hriâm mê nâp dêi. Tiô ngoh Trần Văn Nghĩa, ối a kong pơlê Hà Nam tối, troăng pơkâ kố, kô gum rak vế tơniăn, tơdâng tơ’mô pơla hok tro ki hriâm a hngêi trung dêi tơnêi têa ƀă hngêi trung krê pá kong:

“Hok tro ki hriâm a mâ hngêi trung krê pá kong kô châ gum kơxô̆ liăn ki hriâm, á hlo kố cho tơdroăng ki tơxâng phiu ro păng ‘nâng, tâng vâ tối cho tơdroăng ki lĕm tro. Xua păng ‘nâng, tơdroăng pơkâ luât nếo kố, ôh tá xê to gum ăm rơpŏng hngêi á ki ai kuăn ‘nĕng hriâm, mê ối ai pơxúa kân khât ăm mâu nôu pâ, rơpŏng hngêi ki hriâm a mâu hngêi trung krê pá kong. Ki má péa nếo, á xuân hlo, kô ai tơdroăng ki tơdâng tơ’mô pơla mâu vâi o, vâi muăn a hngêi trung krê pá kong ƀă hngêi trung dêi tơnêi têa”.

Tiô tơdroăng riân ngăn dêi Khu xiâm ngăn ‘na Hnê hriâm ƀă Hnê mơjiâng tuăn ngôa rơkê tối, troăng luât ki kố ga ai pơxúa ăm dâng 23 rơtuh 200 ropâu ngế hok tro ki hriâm ing râ mầm non troh a lâm 12 (mê cho ta hâi teăm riân hok tro ki hriâm a mâu tíu xiâm tơdroăng cheăng ƀă yăo yuk thưong xuên), ing mê, kô veăng gum kơdroh ki hơngăm hngo, pá puât ăm mâu rơpŏng hngêi, nôu pâ, tơtro tơxâng ƀă túa rêh ối nếo, troăng tơdjâ, troăng pơkâ dêi Đảng, Tơnêi têa ƀă kơvâ hnê hriâm ƀă xuân tơtro ƀă túa pêi pro tơdjuôm dêi mâu kong têa ki dế mơnhông tơtêk kro mơdrŏng.