VOV4.Xơ Đăng - Pơtối tơdroăng roh hôp má 9, kơxo lơ 14/3, tơmâng Khu râ kăn séa ngăn tơdroăng tơbleăng ‘na tơdroăng châ tơƀrê apoăng ‘na tơdroăng rah pro ăm tơtro mâu kơ koan pơkuâ tơnêi têa râ tơring, râ cheăm tung hneăng hơnăm 2019 – 2021, Vi ƀan pơkuâ Kuô̆k hô̆i pơkâ ôh tá pêi pro troăng hơlâ tơ’mot râ tơring mot tung pơlê kong kơdrâm vâ tơniăn tơtro tơdroăng xing xoăng ăm tơtro mơngế pêi cheăng ƀă pơkâ pêi pro kơpong kuăn pơlê rêh ối tê mơdró.

Klêi kơ’nâi séa ngăn ăm hlo, mâu kong pơlê hiăng tơkŭm pêi pro ‘nâng ‘nâi châ 08 tíu pơkuâ tơnêi têa râ tơring ƀă 561 tíu pơkuâ tơnêi têa râ cheăm; 3.437 kơ koan, khu tơrŭm cheăng a râ cheăm ƀă 429 kơ koan, khu tơrŭm cheăng a râ tơring. Tung hneăng hơnăm 2019 – 2021 hiăng kơdĭng liăn ngân tơnêi têa dâng lối 2 rơpâu rơtal liăn. Laga, xua hâi khế pêi pro ối iâ xua mê mâu kong pơlê, tâi tâng kơxô̆ liăn kơdĭng tá hâi tơniăn tŭm ăm tơdroăng mơ’no mâu troăng hơlâ tŏng kum kăn ƀô̆, kŏng chưk, viên chưk rơlối klêi kơ’nâi rah xo ăm pêi cheăng.

A Sa Ly tơplôu ƀă tơbleăng