Cô yăo Ka Duys mơngế K'Ho hiăng ai 6 hơnăm hnê a Hngêi trung râ má péa Tân Thượng, cheăm kơpong hngế hngo Đinh Trang Thượng. Hnê Ngữ văn a hngêi trung ki ai lối 95% ngế hok tro cho mơngế K'Ho, cô hlo môi tơdroăng ki tơviah: hên hok tro 'nâi pơchuât, 'nâi chêh nâl Xuăn la ôh tá 'nâi pơchuât, ôh tá 'nâi chêh nâl dêi kuăn ngo tơná. Sap ing tơdroăng ki tô tuăn mê, hơnăm 2022, châ Khu pơkuâ ngăn hngêi trung môi tuăn veăng tŏng kum, nâ Ka Duys tơkŭm po lâm hnê hriâm nâl K'Ho ki apoăng a hngêi trung ƀă ai 40 ngế hok tro lâm 7 hriâm.

Apoăng cho hnê chư, klêi mê cô lăm tăng troh a mâu ngê̆ nhân tung kơpong thế hnê hriâm túa tŏn chêng koăng, hriâm kơhnhon xuăng klêi mê djâ mâu tơdroăng ki hiăng klêi hriâm mê hnê tung mâu rôh tơkŭm xah hêi krê ăm hok tro Cô yăo Ka Duys tối, mâu chôu hriâm ôh tá xê to kum hok tro chiâng pơchuât, chiâng chêh nâl K'Ho mê ối hlê tơ'nôm ki kơnâ khôi túa lĕm tro dêi hdroâng kuăn ngo tơná.

“Cho mơngế K'Ho á hlo nôkố tâng ôh tá rak vế khôi túa lĕm tro hdroâng kuăn ngo mê kơ'nâi ah kô rế hía lôi. Ing mâu tơdroăng pêi pro ki kŭn dêi mâu vâi pú hok tro mê kố xuân cho mâu plá on vâ mâu túa lĕm tro mê, vâi o kô chiâng 'nâi mâu tơdroăng ki kơnía git, mâu vâi o kô chiâng xo mâu tơdroăng ki mê vâ pơtối râk vế, chôu 'măn khôi túa lĕm tro ing ton nah dêi mơngế K'Ho".

A mâu hngêi trung kơpong hdroâng kuăn ngo dêi Lâm Đồng, hên thái cô xuân dế tăng troăng rơtế prôk ƀă hok tro ing mâu tơdroăng pêi pro ki nhên khât. Cô Nguyễn Thị Hương Giang, Tôh trương chuyên môn, hnê Hngêi trung râ má pái Phan Đình Phùng, cheăm Dam Rông 3, tối tiah kố tơdroăng hâk vâ hơ-ui kơ hok tro châ mơhno ing tơdroăng hbrâ rơnáu nhên tơrêm ƀai hnê, kơhnâ tung tơrêm tơdroăng hnê hriâm.

Hơnăm hriâm kố nah mâu vâi o hok tro dêi hngêi trung xua cô Giang pơkuâ ngăn hnê hiăng châ kâ 9 to pri hok tro rơkê râ kong pơlê rơtế ƀă 4 ƀai chêh châ kâ pri STEM râ hngêi trung.

“Tâng pin ai tuăn pâ kơ hok tro mê pin nếo po troăng ăm mâu vâi o. Ƀă mâu hok tro ki xơpá mê ôh tá xê hnê to tung hlá mơ-éa mê á djâ hok tro lăm prôk ngăn drô kĭng têa kroăng Krông Nô vâ mâu vâi o hriâm mâu tơdroăng 'na mâ hlo tơmeăm khoăng nhâ loăng kong ki lĕm, ‘na tơnêi tơníu, ‘na hyôh kong prâi. Á tơmiât tiah kố mơhé vâ xơpá ó to kéa lâi troh lâi mê cô ƀă hok tro pơrá athế tơ'noăng dêi rơpó hnê rơkê ƀă hriâm rơkê khât".

Ƀă mâu thái cô a kơpong xơpá, hâk vâ hok tro ôh tá xê to tơmâng troh tơrêm kơxô̆ điêm. Mê ối cho tăng troăng ti lâi vâ mâu vâi o ôh tá lôi pơtê hriâm, kum mâu vâi o ki rêh ối xơpá pơtối châ lăm hriâm a hngêi trung, pro tíu ki vâ hok tro hdroâng kuăn ngo loi tơngah mơhno ki hlê dêi tơná. Ing tơdroăng ki mê xuân châ thái Nguyễn Quốc Huy, Ngế pơkuâ hnê ngăn Chi ƀô̆, Ngế pơkuâ Hngêi trung râ má pái phôh thong Nguyễn Trường Tộ, cheăm Tân Hải, ki hiăng hmâ hnê tung 22 hơnăm.

Thái hiăng 5 hdroh châ pơxá inâi Ngế ki hnê rơkê râ cheăm. Ƀă thái Huy, tơdroăng ki kal má môi cho mơjiâng môi hngêi trung ki hok tro rơhêng vâ troh rêm hâi. Ing túa pơkuâ hlối tơpui rơkê dêi ngế kăn ƀô̆, thái cô troh tơdroăng tơmâng xo tơdroăng púi vâ dêi hok tro pơrá thế tơmiât troh môi tơdroăng hnê ƀă hriâm ki lĕm tro.

“Pôa Hồ đi đo hnê pin 'na tơdroăng thế pâ nhuô̆m kuăn mơngế. Hngêi trung hơniâp ro cho tíu tuăn mơno ki lĕm vâ châ pêi pro. Kăn ƀô̆ pơkuâ ngăn mê đi đo tơmâng rơkong tơpui dêi thái cô. Thái cô mê hlê plĕng tơdroăng tơmiât dêi hok tro. Hriâm Pôa Hồ cho pêi pro môi tíu tơpui kâ tơniăn lĕm rêm rơkong tơpui châ tơmâng, mê cho xiâm kối dêi túa lĕm tro hngêi trung krá tơniăn tung la ngiâ”.

Ing tơdroăng hnê chư, hnê tơdroăng ki rơkê plĕng troh rak vế rơkong tơpui, túa lĕm tro hdroâng kuăn ngo ƀă mơjiâng tíu hriâm hơniâp lĕm, mâu ngế thái, cô a kơpong hơngế, hơngo Lâm Đồng dế kơhnâ hnê ăm vâi o "vâi cho mâu ngế ki pơtối” mơngế ki plĕng rơkê ƀă tơdroăng loi tơngah ăm hok tro. Rêm chôu hriâm, rêm tơdroăng pêi pro lơ tơdroăng tơmâng ngăn ăm tơrêm tơdroăng rêh ối dêi hok tro pơrá veăng kum ăm vâi o thăm hâk vâ hngêi trung, hâk vâ khôi túa lĕm tro hdroâng kuăn ngo ƀă loi tơngah mot tung la ngiâ.