Sap ing apoăng hơnăm troh nôkố, Kơpong ôm hyô kong kế nhâ loăng, têa tơnêi têa Mang Deang, tơring Kon Plông hiăng tơdah hên tơmối troh ôm hyô ƀă lối 374 rơpâu ngế châ lối tơdế kơxô̆ ngế tơmối ôm hyô troh a kong pơlê Kon Tum. Pôa Đặng Quang Hà, Kăn hnê ngăn Vi ƀan tơring Kon Plông, ăm ‘nâi, 3 hơnăm a chê kố kơvâ ôm hyô dêi tơring tâk rơdêi, ki nhên cho hơnăm 2022 tơring tơdah 600 rơpâu ngế tơmối troh ôm hyô, hơnăm 2023 cho 1 rơtuh ƀă hơnăm 2024 cho 1,2 rơtuh ngế tơmối ôm hyô.

Laga, tiô pôa Đặng Quang Hà, tơdroăng kố ôh ti xê cho tơring hiăng cho khât kô veăng gum tung tơdroăng ki thăm mơnhông 2 kơxô̆ dêi kong pơlê tâng ôh ti rĕng pêi mâu troăng hơlâ tro ‘ló vâ kơvâ ôm hyô mơnhông krá tơniăn:

“Ôh ti ai troăng hơlâ ki lâi, pôi tá pơkâ tơdroăng vâ pêi mê pin kô ôh tá rak vế châ ki lĕm tâ tá. Mơjiâng pro tơdroăng ôm hyô pâ thế mơ’no hên tơdroăng tung hnoăng cheăng pơkuâ ngăn tơnêi têa, tung tơdroăng ki mơjiâng inâi, mơjiâng um méa dêi Kơpong ôm hyô Mang Deang. Tâng ing nôkố ôh tá chêh pro inâi, mơjiâng pro um méa ƀă mơjiâng pro túa lĕm tro tơpui tung Kơpong ôm hyô Mang Deang mê la ngiâ ah pin kô trâm nếo mâu tơdroăng ki ôh tá tơniăn a hên tíu”.

Vâ veăng gum tâk 2 kơxô̆ dêi kong pơlê Kon Tum tung hơnăm 2025, Kơpong ôm hyô kong kế nhâ loăng, têa tơnêi têa Mang Deang dế châ pro tơ’nôm ivá tơ’mot ăm tơmối ôm hyô. ‘Na tơdroăng ki pơkuâ ngăn Tơnêi têa, mâu khu râ kăn pơkuâ khŏm mơ-eăm pêi pro tro tơdroăng cheăng pơkuâ ngăn túa pơkâ pro; pơkâ xúa troăng hơlâ tŏng gum veăng tơlo liăn tơƀrê tung ‘no pêi cheăng pro hngêi trăng, troăng klông vâ xúa tung mơjiâng pro ôm hyô ƀă hên ki ê.

Ƀă 139 tíu tê mơdró ôu kâ ối pơtê a tơring pơkâ thế athế mơnhông ki rơkê plĕng tung tơpui tơno ƀă tơmối ôm hyô. Pôa Nguyễn Văn Tuấn, Kăn pơkuâ ngăn Golden Boutique Hotel Mang Deang, ăm ‘nâi:

“Tơdroăng ki kal xiâm vâ râng chêng tơmối, vâ ăm tơmối vâ ối pơtê lơ vêh troh nếo a Mang Deăng cho tâi tâng mâu ngế cheăng athế pêi cheăng tâi hiâm mơno tơná, ngăn tơmối môi tiah nhŏng o, rơpŏng hngêi dêi tơná vâ tơpui tơno, rak ngăn krâu tâi hiâm mơno. Ngin đi đo tơmiât ƀă rơhêng vâ rêm hâi, đi đo pơhlêh nếo vâ ngiâ méa nếo. Ƀă mâu liăn ngân ngin ôh tá la lâi pơtê tơdroăng ki hnê mơnhông ki rơkê plĕng ăm mâu ngế cheăng vâ rế rơkê tâ nếo”.

Vâ tơmối ôm hyô troh a Mang Deăng ôh ti xê rế troh hên tâ nếo tung mâu hâi pơtê, rôh leh têt mê troh tung mâu khế tung hơnăm, troăng hơlâ ki hên tơdroăng ôm hyô dế châ kong pơlê Kon Tum ƀă Khu ngăn Ôm hyô Mang Deăng mơdêk rơdêi tơbleăng. Rơtế ƀă “7 to long 3 to xí”, mâu kơpong pêi lo liăn hên, Kơdrum ngê̆ thuât Mang Deang, tíu ôm hyô pơlê pơla Vi Rơ Ngheo, Kon Vơng Kia, tour ôm hyô tăng ‘nâi túa lĕm tro, kong kế ƀă hên ki ê nếo châ mơjiâng pro hiăng pro hên tơ’nôm tơmeăm ôm hyô gum Mang Deang tơ’mot râng chêng tơmối ôm hyô.

Jâ Bạch Thị Mân, Phŏ ngế pơkuâ Khu ngăn túa lĕm tro, Tơ’noăng ivá ƀă Ôm hyô kong pơlê Kon Tum, tối rơdêi, ƀă tơdroăng khŏm mơ-eăm rơtế ƀă ki pơxúa ai hlâu, Mang Deang kô veăng gum kal khât tung mâu tơdroăng mơnhông châ 10% dêi kong pơlê a tung hơnăm 2025.

“Mang Deang tơkŭm tŭm mâu tơdroăng ki ai hlâu. Ngin xuân hiăng tơkŭm mơjiâng pro mâu tơmeăm ki xiâm, ôm hyô túa lĕm tro, ôm hyô ton nah, ôm hyô ‘na tơdroăng loi tĭng, ôm hyô pơtâp ivá ƀă hên ki ê. Sap ing ivá mơnhông, ki ai hlâu ‘na kong kế ƀă tơdroăng ki rơkê plĕng mê mâu kơ koan pơkuâ ngăn Tơnêi têa kô tơrŭm vâ pơla kơ koan pơkuâ ngăn Tơnêi têa, khu mơdró kâ rơtế ƀă dêi rơpó môi hiâm mơno pêi pro chiâng mâu tơdroăng pơkâ mơ’no pêi”.

Ôm hyô châ kong pơlê Kon Tum mơnhên cho kơvâ cheăng ki xiâm tung tơdroăng pơkâ pêi thăm mơnhông tê mơdró vâ chê 13% tung hơnăm 2025. Ƀă ki pơxúa ai hlâu ƀă tơdroăng vâ pêi tung la ngiâ mơnhông rơkê tâ, Kơpong ôm hyô kong kế, nhâ loăng, têa tơnêi têa Mang Deang, tơring Kon Plông dế rơtế ƀă mâu tơring, pơlê kong kơdrâm ki ê dêi kong pơlê Kon Tum khŏm mơ-eăm tơdah châ 3 rơtuh ngế tơmối ôm hyô vâ gum tung mơnhông châ 10% dêi kong pơlê tung hơnăm kố.

Rêm ngế tơmối troh a Mang Deang ôh ti xê châ ngăn châ hlo ki lĕm dêi kong kế mê ối châ veăng gum ăm tơdroăng mơnhông cheăng kâ rêh ối pơlê pơla dêi kong pơlê.