Pơchóu kŏng peăng mâu reăng giấy ki pêt lĕm drô péa pâ troăng a ƀuôn Buôr, cheăm Hòa Xuân, pơlê kong kơdrâm Ƀuôn Ma Thuột, jâ H’Lép Niê vâi hmâ krếo dêi Nôu Khiết ăm ‘nâi, troăng ai to reăng lĕm môi tiah kố, hnoăng ki kân cho dêi kăn phŏ hnê ngăn chi bộ, cho krâ pơlê ngin Pâ Tháp mê:

 ‘’A ƀuôn Buôr, cheăm Hòa Xuân kố, tung mâu hâi hôp dêi pơlê a Hngêi kuăn pơlê hmâ tơkŭm hôp. Kăn pơlê hnê tối ăm kuăn pơlê, rêm ngế rêm hngêi thế pro ăm troăng lĕm krúa, pêt reăng, pêt nhâ ki lĕm, xua mê kuăn pơlê hâk ro. A xuân cho môi ngế kuăn pơlê hmâng krâ pơlê hnê tối tiah mê a xuân pro ƀối, pêt reăng ăm lĕm pơlê’’.

 Pâ Tháp tâng pa kĭng hngêi nếo mơjiâng pro –hnoăng pêi cheăng ki djâ troăng a hdrối tung hnê kuăn pơlê ‘nâi hơ’lêh hdrê pêt

Ôh ta xê to mơhnhôk kuăn pơlê pêt reăng vâ ăm lĕm ăm pơlê, pâ Tháp - krâ pơlê ối cho ngế ki djâ troăng a hdrối tung tơdroăng hơ’lêh hdrê pêt ƀă tơdroăng pêt tơvât tiu, sầu riêng tung kơdrum kơphế. Klêi túa pêi cheăng tơƀrê, pâ Tháp kơhnâ hnê thế kuăn pơlê pêi cheăng tiô khoa hok kih thuât tung tơdroăng pêt loăng plâi, păn mơnăn veăng pêi tơdroăng mơnhông cheăng kâ. Ngoh đi đo tơmâng lăm pôu, hơhnhôk mâu rơpŏng kơtiê, rơpŏng ai hnoăng tơnêi têa, rơpŏng mơngế ki ôh tá ai ngế păn roăng chĕm mơ’rêh ki kơtiê xơpá... Ing mê, ai mâu túa kơjo kum ki pơxúa vâ tơniăn tơdroăng rêh kâ ối. Ngoh Y Sol Ƀuôn Dap, ối a ƀuôn Buôr tối:

 ‘’A pơlê kố, pâ Tháp cho kăn pơlê kum kuăn pơlê pro hlá mơ-éa, hnê  kuăn pơlê túa pêi chiâk, pro hlá mơ-éa a Vi ƀan cheăm, hnê kuăn pơlê mơnhông cheăng kâ, kum kuăn pơlê xông tơƀrê ‘na tơdroăng cheăng kâ rêh ối”.

Ối chôu pâ a rôh mâu kăn cheăm ƀă kuăn pơlê a ƀuôn Buôr pôk pôa pro kăn phŏ pơlê klêi mê nếo pôk pro kăn pơlê, ngoh pâ Tháp tối, a hơnăm 2011 nah, tung pơlê hlo ai tơdroăng mâu khu ‘mêi tí tăng pơlông tối tơdroăng ôh tá tro, pơlông djâ kuăn pơlê prôk tiô troăng ki ôh tá tro, pâ Tháp xuân xâu tô tuăn há. Klêi kơ’nâi hiăng tơmiât nhên ‘nâi ki lâi tro ki lâi ôh, pâ Tháp hiăng rơtế ƀă mâu kăn cheăm, pơlê lăm pôu tơrêm rơpŏng hngêi hnê tối ăm kuăn pơlê hlê nhên. Kơnôm ing mê pâ Tháp châ mâu kăn cheăm pơlê bă kuăn pơlê tung pơlê loi nhoăm kơ pôa pơcháu ăm pôa pro kăn phŏ pơlê klêi  mê pro kăn pơlê, klêi mê nếo pro kăn phŏ pơkuâ hnê ngăn Chi bộ pơlê. Pêi hnoăng cheăng hngăm hngo, pâ Tháp tơmiât dêi tơná kô mơ-eăm tâ nếo, kô djâ troăng a hdrối vâ tơxâng ƀă hnoăng cheăng ki kuăn pơlê hiăng loi hiăng pơcháu kơ pôa:

 “Á tối pơtâng kơ kuăn pơlê thế ngăn a kố, pôi tơmâng mâu ki ê hnê pơlông djâ pro tơdroăng ôh tá tro, thế ‘nâi ki lâi ‘ló ki lâi ôh, mâu kăn ôh tá pơrah ngế ki lâi kuăn pơlê ki lâi, xuân tơmâng kơ kuăn pơlê. Pin thế tơmiât troh tơdroăng rêh ối dêi tơná ki ahdrối, ai tơdroăng rêh ối tơniăn lĕm, hngêi trăng lĕm, pêi cheăng kâ châ tơƀrê, ai hmê kâ tŭm. Kuăn pơlê xuân hlo nôkố tơnêi têa hiăng ‘no liăn kâng pro rơchôa ăm pin ai têa tôh báu, loăng plâi, pro troăng ăm krúa lĕm, tơnêi têa ôh tá lôi kuăn pơlê pin mê kuăn pơlê loi nhoăm ‘’.

Tối ‘na hnoăng cheăng pêi dêi kăn phŏ hnê ngăn chi ƀô̆, pâ Tháp, kăn ƀuôn Buôr, pôa Nguyễn Đức Thuận kăn hnê ngăn Đảng ủy cheăm Hòa Xuân tối:

 “Pâ Tháp hơnăm ối nếo, hlối rơkê kơhnâ ‘nâi hriăn plĕng tơdroăng ki nếo malối pêi cheăng tâi ivá ƀă kuăn pơlê, ngoh ai hên tơdroăng ki hơ’lêh nếo tung pơla mơjiâng thôn pơlê nếo. Ƀuôn Buôr hdrối nah xuân cho pơlê ki xiâm, nôkố mâu rơtăm rêm hơnăm rak vế  pêi pro tro tơdroăng lăm pro mố đô̆i, drêng pơcháu mơngế lăm pro mố đô̆i kơxô̆ mơngế luâ tơdroăng pơkâ, klêi mê pêi hnoăng cheăng dêi cheăm, tơring pơcháu tối tơbleăng ti lâi ngoh tơbleăng tối ăm kuăn pơlê ‘nâi tâi, pêi cheăng tâi ivá’’.

Tung mâu hnoăng ki ngoh pâ Tháp veăng ‘no, kăn hnê ngăn Chi ƀô̆, kăn pơlê dêi ƀuôn Buôr tung mâu hơnăm hdrối mê hía nah ôh tá xê to veăng ‘no hnoăng hơ’lêh mơnhông tơdroăng rêh ối dêi kuăn pơlê, mê ối hnê tối ăm kuăn pơlê tơmâng loi kơ Đảng, Tơnêi têa; cho tíu kơ tơngah loi nhoăm khât, cho “kông ki tơdjêp” pơla mâu râ Đảng, mâu kăn ƀă kuăn pơlê tung tơdroăng mơjiâng tơdroăng kal kí, pro xiâm mơnhông cheăng kâ-rêh ối a pơlê./.