Măng tĭng hdrối kŏng ti on tơhrik Dak Lak tơrŭm ƀă ƀơrô Kan sát hbrâ tơpâ on chếo ƀă tŏng xo mơngế hliăng tiâ – Kŏng an kong pơlê Dak Lak tơkŭm po 2 lâm pơtâng tối, tơbleăng tơdroăng ƀă hnê pơtâp tơdroăng hbrâ tơpâ on chếo ăm lối 530 ngế kăn ƀô̆, kŏng nhân viên kơvâ on tơhrik. On tơhrik Dak Lak nôkố pơkuâ 17 tơmeăm ối tung khu ki rơ-iô ‘na chếo, pơtôu; pakĭng mê, u ối 14 khu pơkuâ mơjiâng pro dêi mâu on tơhrik a kong pơlê.

Tung pơla kố nah, tơdroăng hbrâ mơdât chếo pơtôu đi đo châ kơvâ on tơhrik tơmâng tŏng kum, pơtroh mơngế pêi cheăng, kơxô̆ liăn vâ pêi pro lĕm tro. Tung roh hnê pơtâp pơla kố nah, mâu kăn ƀô̆, mơngế cheăng on tơhrik Dak Lak hiăng châ kăn ƀô̆ Kan sát hbrâ tơpâ on chếo kong pơlê Dak Lak tối ‘na tơdroăng chếo pơtôu, tơbleăng mâu mơ-éa luât ai tơdjâk troh tơdroăng cheăng kố.

Pakĭng tơdroăng hbrâ tơdroăng, mâu troăng rak tơniăn hbrâ tơpâ on chếo, mâu ngế hriâm hiăng châ pơtâp séa ngăn mâu tơdroăng ki rơ-iô ‘na chếo pơtôu, xúa mâu kơmăi kơmok tơpâ on chếo, tơdroăng ki hluăn tung on chếo, troăng pâ pơlât apoăng ƀă hía hé. Tơdrêng amê, pơtâp tơpâ on chếo, tŏng xo mơngế hliăng tiâ drêng ai on chếo a tíu pêi cheăng Kŏng ti ƀă hnôu Ea Tam.