Hngêi trung Râ má môi - Râ má péa Sa Loong, cheăm Sa Loong, kong pơlê Quảng Ngãi nôkố ai 36 to lâm ƀă lối 1.100 ngế hok tro, tung mê ai 90% ngế cho kuăn ngo Rơteăng, Ca Dong, Jêh - Triêng, Bơhnéa, Brâu, Rơđế, Mường, Tày... Hơnăm hriâm la ngiâ, hngêi trung kô tâk 40 lâm ƀă dâng 1.250 ngế hok tro.

Hngêi trung Râ má môi - Râ má péa Sa Loong châ rah mơjiâng pro chiâng hngêi trung ai tíu kâ koi ối pơtê tơrêm râ, vâ ăm vâi o tung cheăm hriâm. Kố cho troăng hơlâ ki kân, kum hok tro kơpong tơkăng kong châ hriâm tơniăn tâ.

Pôa Nguyễn Hữu Phượng, Ngế pơkuâ Hngêi trung Râ má môi - Râ má péa Sa Loong ăm ‘nâi, nôkố hngêi trung ai 70 ngế kăn ƀô̆, thái cô, mơngế pêi cheăng tung hngêi trung. Hngêi trung hiăng tơkŭm hnê hriâm 2 xôh tung môi hâi, tung hên hơnăm hdrối la hâi ai tŭm tơmeăm vâ tơkŭm po hnê ăm kâ koi pơtê kơhâi dé ăm hok tro. Hngêi trung dế tơrŭm ƀă Vi ƀan Kuăn pơlê cheăm Sa Loong ƀă mâu tíu pêi cheăng, kơvâ cheăng ki tơdjâk troh po rơdâ tơnêi vâ mơjiâng pro hngêi trung tơrŭm péa râ, hnê ai tíu kâ koi ối pơtê tiô pơkâ dêi Khu xiâm ngăn hnê hriâm ƀă hnê mơjiâng tuăn ngôa rơkê ƀă tơnêi mơjiâng pro ki iâ 5 ha.

“Klêi tâng tối tơbleăng, sap hâi lơ 3/11/2025 kô tơkŭm po leh pơxiâm mơjiâng pro, mê rêm khu râ kơvâ cheăng, rêm râ dế thâ ‘mâi rơnêu ƀă pơkâ vâ pêi tro tiô tơdroăng hiăng hdró. Nôkố, lâm hriâm dêi vâi o vâi muăn xuân tŭm; tơdroăng mơjiâng kô châ tơbleăng a tơnêi ki xoăng ăm tơ’nôm, ôh tá tơdjâk troh pêi cheăng hriâm tâp dêi hok tro. Rêm ngế púi vâ troăng hơlâ rĕng tơbleăng vâ kuăn pơlê châ xúa luât pơkâ tŏng gum dêi Tơnêi têa ăm kơpong tơkăng kong”.

Tiô pôa Nguyễn Ngọc Thái, Ngế Pơkuâ ngăn Hnê hriâm ƀă hnê mơjiâng tuăn ngôa rơkê kong pơlê Quảng Ngãi, pêi pro tiô troăng hơlâ dêi Chin phuh, kong pơlê Quảng Ngãi mơjiâng 9 toăng hngêi trung râ má môi ƀă râ má péa ai tíu kâ koi ối pơtê a 9 to cheăm tơkăng kong dêi kong pơlê. Tung rôh má 1 (hơnăm 2025), kong pơlê kô mơjiâng pro a 4 to cheăm, mê cho cheăm: Dục Nông, Sa Loong, Rờ Kơi ƀă Mô Rai; tâi tâng kơxô̆ liăn ‘no mơjiâng pro lối 1.000 rơtal liăn. Pôa Nguyễn Ngọc Thái ăm ‘nâi tơ’nôm, tung hơnăm 2025 Chin phuh hiăng ăm kong pơlê 117 rơtal liăn, ki u ối kô ‘no xúa pêi cheăng tung hơnăm 2026:

“Tơdroăng ga nôkố dế tơvâ tơvân la tâi tâng mâu tíu pêi cheăng, kơvâ cheăng xuân vâ môi tuăn. Tối tơdjuôm cho tơnêi dêi cheăm mê tâi la peăng ăm hngêi trung hâi teăm ăm. Xua mê, nôkố thế ‘mâi hơ’lêh, tơ’nôm pơkâ môi tiah lâi ‘lo vâ châ ăm tơnêi, vâ rĕng mơjiâng pro hngêi trung tung la ngiâ”.

Kong pơlê Lâm Đồng ai 5 to cheăm tơkăng kong ƀă tơnêi cho Tuy Đức, Quảng Trực, Thuận Hạnh, Thuận An ƀă Dak Wil. 5 to cheăm mê nôkố ai 47 to hngêi trung hriâm tung mê, ai 39 to hngêi trung tơnêi têa, 5 to hngêi trung dêi kuăn pơlê tơlo liăn pro. Tung mê bú ai 1 to hngêi trung râ má pái phôh thong kuăn ngo ai tíu kâ koi pơtê. Pêi pro tiô hnê mơhno dêi Vi ƀan kuăn pơlê dêi kong pơlê, Khu xiâm ngăn hnê hriâm ƀă hnê mơjiâng tuăn ngôa rơkê Lâm Đồng dế tơrŭm ƀă mâu kơvâ cheăng ƀă mâu kăn 5 to cheăm, tơbleăng tơdroăng tơkê bro mơjiâng pro rêm to cheăm 1 to hngêi trung hnê ai tíu kâ koi ối pơtê liên cấp.

Tiô jâ Lê Thị Bích Liên - Ngế pơkuâ hnê hriâm ƀă hnê mơjiâng tuăn ngôa rơkê kong pơlê Lâm Đồng, hiăng ai 2 to cheăm tơkăng kong, cho cheăm Thuận An ƀă Quảng Trực dế thâ hbrâ mâu tơdroăng ƀă kô pơxiâm mơjiâng pro hlối tung hơnăm kố 2025. Rêm to hngêi trung ai 30 to lâm, búa hnê hriâm ăm dâng 1.000 ngế hok tro. Jâ Lê Thị Bích Liên phiu ro tối, mâu hngêi trung pro mê tơngah kô kum ăm hok tro kơpong hơngế hơngo tơkăng kong ai tiu kâ, koi, ối, hriâm tơniăn, veăng mơnhông rế ai hên mơngế pêi cheăng ƀă ‘mâi mơnhông cheăng lêng - kring tơniăn tơkăng kong tung kơpong.

“A cheăm Quảng Trực ƀă Thuận An châ Khu xiâm ngăn hnê hriâm chêh ‘mot tung inâi ‘no liăn mơjiâng tơmeăm khoăng, kơxô̆ liăn pro ai 114 rơtal liăn ƀă pơkâ thế mơjiâng pro hdrối hâi lơ 18/12/2025. Troh nôkố, cheăm Thuận An hiăng mơdêk tŭm mâu tơdroăng ƀă Pơkâ rak ngăn tơdroăng tơkêa bro 3  dế pro mâu hồ sơ, hlá mơ-éa vâ pơtroh ăm kơpêng, mơ-eăm mơ’nui khế 10 klêi ƀă apoăng khế 11 la ngiâ kố mơjiâng pro. A cheăm Quảng Trực dế pêi pro tơdroăng chêl thiăn liăn ‘mâi xĕn tơnêi tíu, mơ-eăm mơ’nui khế 12 kô pơxiâm pro”.

Pêi pro tiô troăng hơlâ Khu xiâm Kal kí ‘na mơjiâng pro hngêi trung ăm mâu cheăm tơkăng kong, tung hơnăm kố, Dak Lak kô pơxiâm pro 3 to hngêi trung phôh thong ai tíu kâ koi ối pơtê tơdjêp tâi tâng kơxô̆ liăn ‘no lối 390 rơtal liăn. Mâu hngêi trung mê châ mơjiâng pro a 3 to cheăm tơkăng kong Ia Lôp, Ia Rvê ƀă Buôn Đôn kô châ pro hên môi hdroh apoăng khế 11 la ngiâ.

Kăn pơkuâ hnê ngăn Đảng ủi Dak Lak pôa Lương Nguyễn Minh Triết tối ăm ‘nâi, Ia Lôp cho môi tung 7 to cheăm ôh tá tơ’mot dêi kong pơlê, ai ki krê xêh kơpong tơkăng kong mê hlối tơ’lêi, hlối trâm hên pơloăng mơnúa xua tơnêi tíu kân rơdâ, kuăn pơlê ối preăng prêh. Kăn pơkuâ hnê ngăn Đảng ủi pơkâ thế kong pơlê tối nhên tơmeăm khoăng ai hlâu, tơkâ luâ tíu xơpá, pơ’lêh nếo tuăn tơmiât vâ mơnhông krá tơniăn tung mâu hơnăm la ngiâ.

“Xuân kuăn mơngế mê, cheăm mê la ƀă tơnêi tíu, kơlo, ki pơkâ thế dêi tơdroăng cheăng nôkố xuân hên tâ, hnoăng cheăng hdrối nah dêi cheăm ton bú 197 tơdroăng cheăng, nôkố 1.065 tơdroăng cheăng. Xua mê thế ‘nâi nhên hnoăng cheăng, ki kal dêi tơná ing mê vâ ‘nâi nhên nếo troăng hơlâ tơdroăng cheăng, pơloăng mơnúa tơdroăng cheăng, mâ ngăn ƀă tuăn tơmiât dêi tơná. Tuăn tơmiât thế tâi tâng, mâ ngăn thế tro dêi tơnêi têa ƀă pêi pro mê kong pơlê mê mâu vâi pú nếo châ pêi pro ki pâ thế pơ’lêh nôkố”.