Rơtế ƀă mâu túa pơkâ hbrâ ví khía mơhot ăm troăng prôk, hno long têa mâu kong pơlê Peăng hdroh Tơnêi têa ƀă Tây Nguyên ối hbrâ “pŭn tơdrêng”, hbrâ rơnáu ‘mâi xĕn kuăn pơlê, pôi tá ăm tro kơdrâ.

Tiô túa pơkâ hbrâ ví ƀă khía mơhot rôh má 13, mâu kong pơlê kơpong Peăng hdroh Tơnêi têa ƀă Tây Nguyên hiăng krếo thế mâu plong tuk ki ối a têa kơxĭ lăm hmuâ ối a tíu tơniăn; mơ’no têa ƀă tíu ki ‘măn hdoăng têa lối rơtuh met khô̆i a mâu long, rơchoâ, hngêi kơmăi. Ai mâu kong pơlê ki ‘nâ hiăng tơbleăng túa pơkâ ‘mâi xĕn kuăn pơlê ƀă tơdroăng ki pơkâ thế ‘mâi xĕn kuăn pơlê châ hdâ ối a tíu tơniăn klêi hdrối 17 chôu hâi lơ 6/11.

-Hdrối tơdroăng plong mot râ ó dêi kong mêi khía mơhot Kalmaegi, Vi ƀan kong pơlê Lâm Đồng tơbleăng mơ-éa hnê mơhno thâ, pơkâ mâu khu, kơvâ cheăng, kong pơlê ƀă mâu tíu pêi cheăng ki tơdjâk hbrâ mâu troăng hbrâ, ví kong mêi khía mơhot, kong mêi têa lân lu. Kăn hnê ngăn Vi ƀan kong pơlê Lâm Đồng pơkâ mâu cheăm, bêng, ki rơhêng vâ tối kơpong Phú Quý séa ngăn krá tơniăn hyôh kong prâi, tối teăm tơdrêng troh kuăn pơlê, ôh tá lôi ai tơdroăng tơngôu.

Tơdrêng amê, séa ngăn mâu kơpong kuăn pơlê kĭng têa kroăng, têa plông, kơpong a’nâi, tơ’lêi tơhnah tơhnâp, hbrâ troăng xĕn kuăn pơlê troh tíu tơniăn.

-Vâ hbrâ ví ƀă khía mơhot kân rôh má 13 Kalmaegi, dế hiăng vâ plong mot troh a tơnêi ƀă hlo ôh tá tơniăn, kăn ƀô̆, lêng Mố đô̆i gâk tíu tơkăng kong, kong pơlê Gia Lai dế tơrŭm ƀă kăn pơkuâ kong pơlê gum kuăn pơlê rak ngăn dêi mâu hngêi trăng, xĕn mâu tơmeăm lo ing hngêi troh ối a tíu tơniăn; tơdrêng amê hlối rak vế tơdroăng ki gâk plâ hâi plâ măng vâ teăm hbrâ ví ƀă mâu tơdroăng ki ôh tá tơniăn tâng lo trâm. Nôkố tâi tâng khu lêng mố đô̆i gâk tơkăng kong têa kơxĭ Gia Lai ai 18 khu ƀă 280 ngế kăn ƀô̆, lêng rơtế ƀă 19 toăng rơxế ô tô, 185 rơxế hon da, 20 to plong tuk ƀă canô rơtế ai tŭm mâu kế tơmeăm ki vâ tŏng xo, mâu ngế ki hliăng tiâ.

Đăi tă Trần Tiến Hải - Phŏ kăn pơkuâ xiâm Khu pơkuâ ngăn lêng, hlối cho kăn pơkuâ Khu hnê mơhno Mố đô̆i gâk tơkăng kong, kong pơlê Gia Lai ăm ‘nâi: Mâu đông, mâu tíu ối dêi mố đô̆i gâk tơkăng kong hiăng pơtroh kăn ƀô̆ lăm chu troh a mâu kơpong ki kal, hnê tối, mơhnhôk tơdrêng troh vâi krâ nhŏng o mơdêk hiâm mơno hbrâ kơchăng, pôi tá tơngôu.

Mâu tíu pêi cheăng xuân hbrâ rơnáu ‘mâi mơnhông tíu ối, hmốu vâ kanag kơdât têa, hbrâ rơnáu tíu ối ăm kuăn pơlê drêng kal. Kế kâ, têa tôu, pơkeăng pơlât hiăng châ ‘măn kơdĭng tŭm.