VOV4.Xơ Đăng - Ƀă lối 1 ha tơnêi pêi báu ƀă pêt kơchâi ngiât tŭm túa, tung hơnăm 2021, maluâ trâm tơdroăng xơpá ‘na tơdroăng ki ê xua tơdjâk ing pơreăng COVID-19, la kơnôm ing tơdroăng ki pêi tiô túa pêi troh dâng lâi tê troh dâng mê, rơpŏng pôa K’Pìn, a cheăm Dà Ròn, tơring Đơn Dương, kong pơlê Lâm Đồng xuân ối rak tơniăn kơxô̆ liăn pêi lo ăm rơpŏng hngêi.

Ki nhên, mơgêi môi hơnăm pêi cheăng, ôh tá riân liăn ngân ‘no hrê rêm hâi, rơpŏng pôa ối châ ‘măn kơdĭng lối 60 rơtuh liăn. Xua mê, Têt troh xuân châ rơpŏng roê mâu kế tơmeăm ki kal xúa tung hngêi vâ tơdjuôm ki hơniâp ro ƀă pơlê, cheăm. Pôa K’Pìn, tối:

“Rôh têt kố, rơpŏng á pêt lối 1 sào reăng, xuân ôh tá hên ôh, yă tê mê ngăn kơ tíu ki roê, pêt iâ châ xo iâ, pêt hên châ xo liăn hên. Pakĭng pêt báu, rơpŏng á ối pêi tơ’nôm mâu kơchâi prá. Laga, yă tê ai drêng ‘nâ chu, ai drêng ‘nâ to, la rơpŏng á xuân ối pêi châ liăn tơniăn. Têt troh rơpŏng á xuân tơkŭm môi tiah mâu rơpŏng ki ê, vâi ai klâi mê pin ai ki mê há. Xuân ai mâm í, peâp, ƀă to lâi  xiâm drôu vâ khĕn mâu nhŏng o tung pơlê rơtế ôu, vâ tơpui tối ăm dêi rơpó mâu tơdroăng hơniâp ro rơtế ƀă rơpŏng á”.

Katarina Nga tơplôu ƀă tơbleăng