Tung 5 hâi pơtê leh, sap ing hâi lơ 29/8 troh lơ 2/9, tâi tâng kơxô̆ tơmối troh lăm ngăn, ối pơtê tung kong pơlê Lâm Đồng dâng 680.000 ngế, tâk 15% tâng pơchông ƀă rôh kố hơnăm nah. Pêi lo liăn ôm hyô châ dâng 1.410 rơtal liăn. Tơmối ối pơtê tơkŭm kơdrâm sap ing hâi lơ 29/8 troh 1/9. Kơbong ối dâng châ 65-70%; krê hngêi ăm tơmối kâ koi ối pơtê 3 troh 5 hơlŏng châ dâng 80 – 85%, tung mâu hâi sap ing hâi lơ 30/8 troh lơ 1/9.

Tung mâu hâi ki hên sap ing hâi lơ 30/8 troh lơ 1/9, hên hngêi ăm tơmối ối pơtê châ 100%. Hneăng pơtê hơnăm kố, ôm hyô Lâm Đồng tơkŭm po ai kơdrâm kơdrĕng mơngế prôk troh, sôk ro ƀă hên tơdroăng mơhno khôi túa lĕm tro, xah hêi; Tơraih tơƀai lâp plâi tơnêi Liên Khương vêh ăm tơƀai kơneăng xuân gum tơdjêp, mơhnhôk tơmối troh.

Yă kơbong ƀă mâu tơdroăng ôm hyô tơniăn, tâk iâ tâng pơchông ƀă hâi tiah hmâ; ôh tá ai tơdroăng ki hdjip yă, toi hrot tơmối. Gâk kring tơniăn, troăng klông tơniăn, hbrâ mơdât tơpâ on chếo ƀă tơniăn a mâu kơpong, tíu ôm hyô châ rak tơniăn.