Tíu xiâm pơlât ngăn mâu lêng tro rong Nho Quan cho 1 tung 30 tíu Pơlât ngăn mâu lêng mố đô̆i ki tro rong ó tung lâp tơnêi têa. 55 hơnăm cheăng pơlât ngăn, Tíu xiâm pơlât kố hiăng tơdah xo pơlât, ƀă hlối păn roăng lối 2 rơpâu ngế lêng mối đô̆i tro rong râ, mâu ki rong ó.

Nôkố, tíu kố dế cho “hngêi  tơdjuôm’’ dêi 68 ngế tro rong râ, 23 ngế ki ai hnoăng tơplâ nah ƀă kuăn xiâm dêi mơngế ki ai hnoăng tơplâ tro trếo ‘mêi xâ nah, 56 ngế kơtiê xơpá ó. Tơbleăng a kố, pôa Phạm Minh Chính rơrêk tung hiâm mơno tối tơdroăng ki khéa kho châi heăng tung hiâm mơno dêi mâu Jâ Nôu Việt Nam khên tơnôu ƀă mơngế ki tro rong dế pôu hnoăng ki pá puât. 

Ngế pro xiâm hnê ngăn tơnêi têa púi vâ mâu jâ, nôu, mâu lêng mố đô̆i ki tro rong rĕng mo lĕm châ, tơplâ ƀă pơ reăng, cho mâu ngế ki djâ troăng lĕm a hdrối ăm rơxông nếo pêi pro ƀối.