VOV4.Xơ Đăng - Vâ chê 9 rơpâu ngế rơtăm ki kơhnâ rơkê a 5 to kong pơlê kơpong Tây Nguyên hiăng lăm pro lêng, pêi pro hnoăng cheăng rak vế Tơnêi têa. Maluâ tơkŭm lăm pro tung pơla ai pơreăng COVID-19 xuân dế tâ tú ôh tá tơniăn, la tơdroăng ki leh pơcháu ƀă tơdah xo lêng hơnăm kố hiăng châ po tơniăn, châ ngăn cho hâi mơdĭng lo lăm pro lêng dêi mâu vâi rơtăm.

Tung roh pơcháu tơdah lêng hơnăm kố, lâp kong pơlê Dak Lak ai 2.500 ngế rơtăm lăm pro mô đô̆i, 427 ngế rơtăm lăm pro kŏng an. Mâu rơtăm Dak Lak lăm pro mô đô̆i roh kố pơrá tơniăn ‘na cheăng kal kí, hơnăm, ivá, ‘na hriâm tâp. Ki nhên, lối 70 ngế hriâm râ đăi hok – kao đẳng; 8 ngế cho đảng viên; rơtăm cho mơngế hdroâng kuăn ngo châ lối 50%. Tung hâi lăm pro lêng, lêng nếo Y Săm Mlô, ối a bêng Ea Tam, pơlê kong kơdrâm Ƀuôn Ma Thuột, tối:

‘’Lăm pro lêng cho hnoăng cheăng ki krih tơviah dêi hơnăm ối nếo. Xua mê, á hiăng chêh đơn pâ mot pro lêng. Á kô mơ-eăm hriâm, pơtâp kêi đeăng hnoăng cheăng’’.

Teăng mâ Khu xiâm pơkuâ Kŏng an, Tĭnh ŭy Dak Lak rơtế mâu khu cheăng, kơvâ cheăng, đoân thêh mơhnhôk mâu rơtăm a Dak Lak lo lăm pro lêng

Kong pơlê Lâm Đồng hơnăm kố ai 1.150 rơtăm lăm pro lêng. Kố cho mâu rơtăm ki kơhnâ rơkê châ rah xo ing 12 tơring, pơlê kong kơdrâm tung kong pơlê. Leh pơcháu tơdah lêng hiăng tơkŭm po kân krip a mâu tơring, tơniăn lĕm ƀă kơnía.

Hơnăm kố, kong pơlê Dak Nông ai lối 1.000 ngế rơtăm lăm pro lêng; tung mê ai vâ chê 900 ngế pro mô đô̆i, lối 100 ngế pro kŏng an. Tung kơxô̆ rơtăm dêi kong pơlê lo lăm gâk kring Tơnêi têa roh kố tâi tâng pơrá cho đoân viên, ai 11 ngế hiăng mơgêi hriâm kao đăng, đăi hok; ƀă ai lối 50% rơtăm cho mơngế hdroâng kuăn ngo.

Roh pơcháu lêng hơnăm 2022, kong pơlê Dak Lak ai 2.500 ngế rơtăm lăm pro mô đô̆i, 427 ngế rơtăm pro kŏng an

2.656 ngế rơtăm dêi kong pơlê Gia Lai xuân hiăng lăm pro lêng gak kring tơnêi têa. Tung kơxô̆ mâu kuăn pơlê Gia Lai mot pro lêng roh kố hriâm râ kao đăng, đăi hok lối 1,4%, ai 22 ngế cho đảng viên; ƀă lối 60% cho mơngế hdroâng kuăn ngo. Tơpui tối ahdrối chô vâ lăm pro lêng, lêng nếo Nguyễn Bá Kiên, bêng Thắng Lợi, pơlê kong kơdrâm Plei Ku tối ăm ‘nâi:

“Á phiu ro, sôk suâ ƀă hâk păng ‘nâng drêng tơná cho ngế pơtối jâ pôa nôu pâ lăm gâk kring tơnêi têa. A hâk păng ‘nâng châ ối tung mơngế lêng mô đô̆i Pôa Hồ vâ mơnhông mơdêk khôi túa kăch măng dêi rơpŏng ƀă tâi tâng hdroâng mơngế, pro ăm á tơdroăng loi tơngah, tơdroăng ki phiu ro tung kuăn mơngế. Tơdrêng amê xuân rơrêk tung hiâm mơno, xuân tá hâi ‘nâi klâi drêng hiăng vâ rêh ối pêi cheăng tung tíu ki nếo ƀă tơdroăng rêh ối nếo, á kô mơ-eăm hriâm tâp ƀă rĕng hmâ ƀă tíu ki nếo vâ tơxâng ƀă rơkong pơchân tối hnê mơhno dêi mâu kăn pơkuâ tung pơlê kong kơdrâm ƀă mâu rơkong hnê mơhno dêi nôu pâ á’’.

Hâi phiu ro lăm pro lêng a pơlê kong kơdrâm Kon Tum

A kong pơlê Kon Tum, tơdroăng pơcháu tơdah lêng xuân hiăng pêi pro krip krih, rĕng tung kơxo hâi lơ 16/2. Hơnăm kố kong pơlê ai 800 ngế kuăn pơlê lo lăm pro mô đô̆i, tung mê ai 8 ngế cho kŏng chưk, viên chưk; 1 ngế đảng viên. Lêng nếo Phạm Hoàng Quốc, ối a bêng Quyết Thắng, pơlê kong kơdrâm Kon Tum, hiăng ai kơdrâi ƀă môi ngế kuăn ối kŭn, tơná xuân dế pêi cheăng ăm môi Kŏng ti Luât a Pơlê kong kân Hồ Chí Minh, lăm pro lêng roh kố tối ăm ‘nâi:

‘’Hâi kố tung hâi lăm pro lêng á phiu ro ‘nâng ƀă xuân môi tiah mâu ngế ki ê ƀă pôu râng hnoăng cheăng dêi môi ngế kuăn pơlê mê á hâk phiu ƀă tơdroăng ki mê. Đông lêng ki á troh vâ pêi pro hnoăng cheăng dêi môi ngế kuăn pơlê cho Trung đoân 990 ƀă pơkâ xiâm dêi á cho kêi đeăng rơkê hnoăng cheăng. Mơhé pá puât, mơhé pá môi tiah lâi á kô mơ-eăm tâi ivá tơná’’.

Leh pơcháu tơdah lêng krip krih tơniăn hbrâ mơdât pơreăng COVID-19 a Gia Lai

Pêi pro tơdroăng pêi cheăng hbrâ mơdât pơreăng COVID-19, tâi tâng cho kuăn pơlê mot pro lêng dêi 5 kong pơlê Tây Nguyên pơrá hiăng châ pâk vaccine trum má 2 ƀă trum má 3; ahdrối hâi lăm pro lêng tôe xo têa môh khăm ngăn SARS-CoV-2 tơniăn 100% mot tung đông lêng tơniăn, ôh tá ai kơbố tro tâ COVID-19.

Phiu ro hâi lăm pro lêng a Dak Nông

Mâu kong pơlê ai kuăn ‘nĕng lăm pro lêng pêi pro tơtro tơdroăng pơtâng tối mơhnhôk kuăn pơlê kum vâ hâi pơcháu tơdah lêng hơnăm kố chiâng hâi lăm pro lêng, pro chiâng sôk xuâ, phiu ro, rơtăm hâk vâ lo lăm gâk kring tơnêi têa.

VOV Tây Nguyên chêh

A Sa Ly tơplôu ƀă tơbleăng