A thôn Mê Ka, cheăm Dam Rông 4, rơpŏng ngoh Liêng Hót Ha Ngát hiăng hbrâ tŭm hlá mơ-éa chêh, hmân ếo, kơxop hlá mơ-éa chêh ăm péa ngế kuăn, môi ngế hriâm lâm 11, môi ngế hriâm lâm 4. Rêh ối a cheăm kơtiê xơpá, tơdroăng rêh kâ ối hên tơdroăng pá puât, la ƀă ngoh Ngát, mơ'no liăn ăm tơdroăng hriâm dêi kuăn cho kơxô̆ liăn mơ'no ôh tá păng lôi. Ngoh tối tiah kố, tung môi pơlê pơla, rế hía tơdroăng rêh ối rế tiô chal nếo, tơdroăng ki rơkê plĕng cho tơmeăm khoăng vâ rơxông hơnăm ối nếo kâi châ hriăn plĕng ƀă ôh tá tro lôi pá rŏng.

"Hriâm cho kal păng 'nâng vâ la ngiâ ah ai rôh vâ kuăn cháu mơnhông tâ. Ôh tá chiâng ăm mâu vâi muăn ối pá rŏng. Xua la ngiâ ah kŏng ngê̆ chal nếo, mê rơkê plĕng dêi tơnêi têa kal hên ngế ai tuăn ngôa rơkê plĕng, kal hên tơdroăng rơkê plĕng ki phá tơ-ê dêi pó. Maluâ xơpá la thế mơ-eăm ăm mâu vâi muăn châ lăm hriâm".

Ki rơhêng vâ tối tơdroăng tơmiât mê rế hía rế hên tung mâu pơlê cheăm dêi hdroâng kuăn ngo a Lâm Đồng. Rêm rơnó pơxiâm mot hơnăm hriâm nếo, mâu rơpŏng hngêi hbrâ rơnáu liăn ngân rôe hlá mơ-éa chêh, hmân ếo, tơmeăm xúa tung hriâm tâp; mâu rơpŏng ki ối pá puât xuân mơ-eăm pêi cheăng kâ, thăm nếo mung liăn vâ kuăn 'nĕng ai tŭm tơmeăm vâ châ troh a hngêi trung mơhriâm.

Ôh tá xê to tơmâng ngăn mâu tơdroăng ki kal tung pơla hdrối kố nah, hên rơpŏng hngêi ối tơtrŏng troăng hơlâ ăm dêi kuăn 'nĕng 'na hriâm tâp, cheăng pêi ƀă rak vế khôi túa lĕm tro. Vâi hlê plĕng tiah kố, hriâm vâ ai tơdroăng ki hlê plĕng, ai cheăng pêi, la xuân cho túa ki vâ ăm rơxông ối nếo thăm loi tơngah drêng lo ing pơlê cheăm. Ngoh Liêng Hót The, mơngế K'Ho ối a Tôh kơphô̆ Bắc Tà Nung, bêng Cam Ly - Đà Lạt, tối:

"Rơpŏng hngêi mê hiăng pơkâ troăng ăm kuăn 'nâi nhên tơdroăng khôi hmâ mê cho ki xiâm. Ing mê, drêng mâu vâi kuăn xông kân mâu vâi kuăn lăm hriâm tơrŭm, tơpui tơno tung hngêi trung kô tơbleăng, mơhno tối ăm mâu vâi pú tung hngêi trung. Klêi kơ'nâi mê mâu vâi kuăn pêi cheăng a mâu kơ koan ki lâi xuân tiah mê kô hlo hâk tơngăm 'na khôi hmâ dêi tơná".

Tâng tơdroăng ki hbrâ rơnáu dêi nôu pâ pro chiâng tơdroăng ki xiâm ing rơpŏng hngêi, mê a hngêi trung, tơdroăng ki hbrâ rơnáu ăm hơnăm hriâm nếo xuân châ tơbleăng sap ing hdrối. A cheăm kơtiê xahpá Đam Rông 4, hơnăm hriâm kố ai lối 4.300 ngế hok tro ing râ mầm non troh râ má péa, ki hên cho kuăn 'nĕng hdroâng kuăn ngo. Mâu hngêi trung châ 'no liăn mơjiâng pro krá lĕm, krúa lĕm; lâm hriâm, plông ƀă mâu tơmeăm xúa tung hnê, hriâm châ hbrâ rơnáu nhên. Cô hnê Phạm Thị Ngọc Bích, Ngế pơkuâ Hngêi trung Mầm non Dà Tông, cheăm Đam Rông 4, ăm 'nâi:

"Ối a hngêi trung mê thái cô kơhnâ khât mơjiâng tơdroăng ki hriâm tâp tung lâm gá lĕm khât. Troh a lâm hok tro châ mơnúa mâu tơdroăng ki tơtro mê cho tơ'mot hok tro. Hngêi trung Mầm non Dà Tông xuân đi đo tơkŭm po mâu tơdroăng ki trâm mâ ai tơdroăng ki mơnúa dêi nôu pâ, thái cô ƀă hok tro ing mê, nôu pâ rế hía rế hmiân tuăn pơtroh dêi kuăn 'nĕng lăm hriâm a hngêi trung".

Lâm Đồng nôkố ai 100 to cheăm ối tung kơpong hdroâng kuăn ngo ƀă kong ngo; tung mê, ai 27 to cheăm kơtiê xơpá, 5 to cheăm tơkăng kong ƀă kơpong Phú Quý. Lâp kong pơlê ai lối 182.000 ngế hok tro hdroâng kuăn ngo. A mâu kơpong ki ối hên xơpá, troăng prôk hriâm hiăng po ăm rôh ki châ achê tơdroăng ki rơkê plĕng, chiâng môi tung mâu tơdroăng ki xiâm kum kuăn pơlê pơhlêh tơdroăng rêh ối.

Pôa Ntơr Ha Krong, ối a thôn Dà Nhinh, cheăm Dam Rông 4, ai 3 ngế kuăn hiăng hriâm klêi đăi hok. Sap ing tơdroăng hơ'muăn dêi rơpŏng hngêi tơná, pôa rế loi tơngah, ai tơdroăng ki rơkê plĕng mê vâi krâ - nhŏng o nếo ai ivá pơkuâ dêi tơdroăng rêh ối, ing pêi chiâk deăng troh tơdroăng ki rơkê plĕng nếo.

"Roh nah hriâm tá hâi ai to lâi la nôkố tâng ôh tá ai chư mê ôh tá chiâng pêi ki klâi. Maluâ tơná pin ôh tá pêi ki klâi kân ôh la tâng pin ‘nâi kơhnâ rak ngăn loăng plâi lơ ‘nâi pơchuât ngăn a kơxâk phon ki lâi mê pơkeăng xuân kal athế ai chư. Nôkố tâng mơngế ki ai tŭm tơdroăng lăm đăi hok tâi. Ing ai chư mê nếo mơnhông châ tŭm tơdroăng tung rêh ối".

Idrâp hơkâ pơxiâm mot hơnăm hriâm nếo hiăng chuât xơtó lâp mâu thôn pơlê a kong pơlê Lâm Đồng, djâ tơdroăng sôk ro hdrối vâ mot hơnăm hriâm nếo. Tơdroăng ki sôk ro mê hnối hlo ƀă mâ ing tơdroăng ‘no liăn tŏng gum dêi mâu kăn mơnhông hnê hriâm, tơdroăng hâk vâ mơ-eăm khât dêi thái cô, troh tơdroăng tơmâng khât, mơ-eăm dêi tơrêm rơpŏng hngêi hdrông kuăn ngo. Kố cho tơmeăm khoăng vâ mâu vâi o hok tro kơpong kuăn ngo dêi kong pơlê Lâm Đồng khên vâ mot lâm hriâm nếo, hiăng hlê iâ pơtối mơ-eăm vâ tung la ngiâ eăng bâ tơƀrê tâ a pơlê xiâm tơná.