VOV4.Xơ Đăng - Tơbâ 91 hơnăm hâi mơjiâng Đoân Droh rơtăm Kŏng san Hồ Chí Minh (26/3/1931 - 26/3/2022), koh tơbâ Hneăng hôp Đoân rêm râ, pêi pro troh tơdroăng Hneăng hôp Đoân lâp tơnêi têa rôh má 12, kơxo kố lơ 1/3, a Hà Nội, po leh pơxiâm po Khế Droh rơtăm 2022 ƀă inâi “Hơnăm ối nếo rơkê” xua Tíu xiâm Đoân Droh rơtăm Kŏng san Hồ Chí Minh tơkŭm po. A Leh pơxiâm po tơdroăng, Tíu xiâm Đoân Droh rơtăm Kŏng san Hồ Chí Minh tơkŭm po mơđah tơbleăng rơkê plĕng “Ki rơkê plĕng dêi hơnăm ối nếo”, ƀă mâu kơbong ki mơđah tơbleăng mâu kế tơmeăm ki rơkê plĕng dêi hơnăm ối nếo, mâu kế tơmeăm khoa hok kong ngê̆ xua đoân viên droh rơtăm veăng hriăn ngăn, pêi pro; mâu kế tơmeăm xúa hơ’lêh kơxô̆ tung hnê tối, hnê hriâm khôi hmâ ămdroh rơtăm mâu phô̆m vâ xông kân ƀă hên ki ê. Tơdrêng a mê hlối hiăng pêt klêi ‘Troăng loăng Droh rơtăm”; pôu, hbru tơmeăm ăm Nôu Việt Nam khên tơnôu ƀă pơxiâm mơjiâng pro hngêi 100 liăn a tơring Thạch Thất ƀă pơlê kong krâm Sơn Tây. Tâi tâng kơxô̆ liăn tơbleăng pro mâu tơdroăng Khế droh rơtăm hơnăm 2022 cho vâ chê 2 rơtal liăn.

Katarina Nga tơplôu ƀă tơbleăng