Rôh hôp kố tơkŭm tung péa tơdroăng ki kân, mê cho khu tơdroăng ‘na hnoăng cheăng Hneăng hôp 14 dêi Đảng ƀă khu tơdroăng mơjiâng Đảng ƀă khu cheăng kal kí. Tơpui a rôh po hôp, pôa Tô Lâm, kăn xiâm pơkuâ hnê ngăn cheăng Đảng tối nhên, a Rôh hôp kố, Khu pơkuâ ngăn xiâm Đảng kô ăm rơkong veăng tơpui ‘na mâu tơdroăng cheăng Ngế cheăng tung Khu pơkuâ cheăng kal kí, Ngế cheăng tung Khu pơkuâ ngăn Đảng dêi hơnăm hneăng hôp 14 ƀă rah xo mâu ngế pêi cheăng tơbleăng veăng cheăng tung Khu xiâm pơkuâ tơdroăng kal kí, Khu xiâm pơkuâ hnê ngăn Đảng hneăng 14.

Kố cho tơdroăng cheăng ki kal dêi tơdroăng ki xiâm xua mâu hnoăng cheăng pơrá pơkâ xua kuăn mơngế. Rah xo tơbleăng tối mâu ngế pêi cheăng ăm kăn pơkuâ ki kân má môi dêi Đảng vâ kăn pơkuâ tơbleăng pêi pro mâu tơdroăng pơkâ pêi, pro kơtăng tung mơnhông tơnêi têa a hneăng ki nếo mê chiâng athế nhên, krá, krâu, tơdrăng tro.

Kăn xiâm pơkuâ hnê ngăn cheăng Đảng tối tiah kố, pakĭng mâu tơdroăng pơkâ rah xo tiô pơkâ môi tiah ƀă mâu kăn ki cheăng tung Tơnêi têa mê pin pơkâ a Rôh hôp Tơnêi têa 12 ƀă 13 pơla hdrối kố nah, tơdroăng ki rah xo tơbleăng tối mâu ngế pêi cheăng veăng tung Khu pơkuâ cheăng kal kí, Khu pơkuâ ngăn Đảng hneăng 14 kal tối nhên tơ’nôm mâu tơdroăng pơkâ thế pêi ki kal tro ƀă hneăng cheăng kăch măng nếo dêi Đảng pin, tơnêi têa pin.