A mâu rôh trâm mâ, tơpui tơno, mâu kăn Việt Nam khĕn kơdeăn pôa  Adylbek Kasymaliev ƀă mâu kăn xiâm Kyrgyzstan lăm pôu Việt Nam, loi khât hneăng lăm pôu kô po troăng ki nếo ăm tơdroăng tơrŭm cheăng hên tơdroăng pơla péa tơnêi têa; tối Việt Nam ngăn nhoăm tơrŭm cheăng ƀă Kyrgyzstan.

Hdrối mê, pôa Phạm Minh Chính ƀă Ngế pro xiâm hnê ngăn kong têa Kyrgyzstan lăm ngăn kơpong tíu tơbâ Hồ Chí Minh, Kăn xiâm hnê ngăn tơnêi têa a tíu pêi cheăng dêi Kăn xiâm hnê ngăn a pơlê kong xiâm Hà Nội.

Pôa Phạm Minh Chính, Ngế pro xiâm hnê ngăn tơnêi têa hiăng tối tơbleăng ăm Ngế pro xâm hnê ngăn kong têa Kyrgzystan ‘nâi ‘na hngêi trá Pôa Hồ, tối ‘na tơdroăng rêh ối pêi cheăng dêi pôa Hồ Chí Minh, Kăn xiâm hnê ngăn tơnêi têa ki poăng rơkê khât ƀă troăng hơlâ tơpui kâ ƀă tơdroăng  hmâ pêi pro ki lĕm ton nah ‘na hên túa lĕm tro, tơdroăng tơplâ khên tơnôu dêi mâu hdroâng mơngế Việt Nam ing mâu tơdroăng ki mê, um méa, môi tiah Têa ƀă On, hơkâ hlái Đông Sơn, loăng pơlái Việt Nam, ếo xŏn Việt Nam ƀă kên ‘ngré ‘ngró Pêa Hdroh ƀă hên ki ê ai ‘măn a kơpong tíu tơbâ.