VOV4.Xơ Đăng - Pôa Bùi Thanh Sơn, Ngế xiâm tơpui kâ pơxiâm lăm pôu pêi cheăng a Hàn Quốc drêng veăng hôp mâu Kăn xiâm Tơdroăng cheăng Đông Nam Á dêi Ngế chêh tôm xo rơkong Khu tơrŭm cheăng ƀă mơnhông mơdêk cheăng kâ tiô rơkong krếo thế dêi Ngế xiâm chêh tôm xo rơkong Tơrŭm cheăng ƀă mơnhông mơdêk cheăng kâ, ing hâi lơ 9 troh lơ 11/2/2022. Ing troăng rơhlâ mơngế pơkuâ xiâm Tơpui kâ Việt Nam, kố cho hneăng lăm pôu Hàn Quốc ki apoăng dêi pôa Bùi Thanh Sơn klêi kơ’nâi pôk pro kăn.

Tơdroăng tơrŭm cheăng pơla Việt Nam - Hàn Quốc pơtối châ rak vế tơ-brê ing hên tơdroăng cheăng, tơpui tơno to khu râ kăn, rêm râ kơvâ cheăng xiâm, kong pơlê châ tơbleăng pêi rơkê, hên túa môi tiah lăm pôu tơdrêng, tơpui tơno tơdrêng, krếo phôn, trâm mâ pakĭng hneăng hôp hên pâ. Việt Nam xuân cho tơnêi têa tơrŭm cheăng ki kal tung Troăng rơhlâ peăng hdroh ki nếo mơdêk dêi Hàn Quốc, Péa tơnêi têa pơtối rak vế kum dêi rơpó, tơrŭm krá tung mâu tơdroăng cheăng tung kơpong ƀă lâp plâi tơnêi.

Gương tơplôu ƀă tơbleăng