VOV4.Xơ Đăng - Kong măng lơ 7/3, a tíu pêi cheăng Khu xiâm tơpui kâ, pôa Bùi Thanh Sơn, ngế xiâm tơpui kâ tơnêi têa pin hiăng ai rôh tơpui phôn ƀă pôa Bogdan Aurescu, ngế xiâm tơpui kâ kong têa Rumani. A rôh tơpui phôn, pôa Bùi Thanh Sơn tối nhên Việt Nam ngăn nhuô̆m ƀă rơhêng vâ pơtối pêi pro trâu hngế ta nếo tơrŭm cheăng khôi hmâ ƀă tơdroăng ki hiăng ton lối 70 hơnăm pơla Việt Nam ƀă Rumani.

Péa ngế xiâm tơpui kâ hiăng tơpui hên troăng hơlâ pêi pro ki nhên vâ mơdêk po rơdâ ƀă pro trâu hngế tơ’nôm tơrŭm cheăng khôi hmâ pơla péa tơnêi têa, tung mê ai tơdroăng ki tơrŭm mơdêk rôh lăm pôu khu râ kăn xiâm ƀă trâm mâ rêm râ, rak vế tơdroăng pơkâ tí tăng ‘nâi tơdroăng kal kí, Vi ƀan tơrŭm cheăng kâ, tê mơdró ƀă ‘no liăn Việt Nam - Rumani, mơdêk tơrŭm mâu kơvâ cheăng khôi hmâ môi tiah hnê hriâm, hnê cheăng pêi, mơhno túa lĕm tro, ôm hyô xuân môi tiah mơdêk rơdêi mâu kơvâ cheăng ki hiăng ai hlâu nếo môi tiah pêi cheăng, pêi chiâk deăng.

Katarina Nga tơplôu ƀă tơbleăng