Pôa Bùi Thanh Sơn, Phŏ Ngế pro xiâm hnê ngăn tơnêi têa tối phiu ro hdrối mâu tơdroăng tơpui tơno khu râ kăn tơkŭm po kơdrâm phiu ro, ƀă hên tơdroăng kơvâ tơrŭm cheăng nếo ƀă tơdroăng tơkêa bro mơ’no liăn cheăng dế châ tơpui tơno.

Phŏ Ngế pro xiâm hnê ngăn tơnêi têa pơkâ thế péa pâ thăm tơrŭm vâ pêi pro, inhên mâu tơkêa ki mâu khu râ kăn pơkuâ râ xiâm hiăng môi tuăn, pêi pro tung tơdroăng Khu tơrŭm cheăng tâi tâng ƀă rĕng kĭ Pơkâ Khu tơrŭm cheăng kâ tâi tâng, mơjiâng ivá mơdêk tơrŭm cheăng pơla péa pâ tung kơvâ cheăng kâ, tê mơdró, mơ’no liăn cheăng, gâk kring tơnêi têa, kŏng ngê̆ rơxông, pơhlêh xúa kŏng ngế, pơhlêh krúa lĕm, pêi chiâk deăng, pêi cheăng...

Phŏ Kăn xiâm pơkuâ UAE tối ăm ‘nâi hiăng hnê mơhno mâu kơ koan, khu râng liăn mơ’no cheăng UAE mơjiâng mâu pơkâ tơrŭm cheăng tung mâu kơvâ, tung mê hiăng pơtroh Ngế xiâm mơ’no liăn cheăng UAE lăm pôu Việt Nam sap hâi lơ 7 – 8/2/2025 vâ tơpui tơno ƀă môi tuăn mâu tơdroăng tơkêa bro, tơdroăng tơrŭm cheăng ki nhên tung la ngiâ.