VOV4.Xơ Đăng - Tung hơnăm 2021, mơhé tro tơdjâk kân dêi pơreăng COVID-19, Rơ’jíu Việt Nam hiăng mơnhên hnoăng cheăng cho kơ koan pơtâng tối tơdroăng kal ki xiâm, pêi kêi đeăng hnoăng cheăng châ pơcháu, veăng kum kân kĭn ăm tơdroăng pơtâng tối tơdroăng kal tiô troăng rơ’jiú, um tơvi ƀă măng Internet’’. Mê cho mơnhên dêi pôa Nguyễn Mạnh Hùng, Ngế xiâm pơkuâ tơdroăng kal tiô troăng rơ’jíu, um tơvi ƀă măng Internet, Kăn phŏ pơkuâ tơdroăng pơtâng tối tơdroăng loi tĭng tiô khôp Tơnêi têa a roh mơgêi tơdroăng pêi cheăng hơnăm 2021 ƀă pêi pro hnoăng cheăng hơnăm 2022 dêi Rơ’jiú Việt Nam.

Tung hơnăm hiăng hluâ, Rơ’jíu Việt Nam hiăng đi đo pêi tiô troăng pơkâ pêi la ngiâ, hnê mơhno dêi Chin phuh, Ngế pro xiâm hnê ngăn Chin phuh, Khu pơkuâ tơdroăng loi tĭng tiô khôp Tơnêi têa, Khu xiâm pơkuâ tơdroăng kal tiô troăng rơ’jíu, um tơvi ƀă măng Internet, tơkŭm pơtâng tối hên tơdroăng, tơdroăng ki kal kân dêi tơnêi têa tung hên tơdroăng, hên xiâm kối, troăng troăng pơtâng tối, hên nâl tơpui.

Pôa Nguyễn Mạnh Hùng, Ngế xiâm pơkuâ tơdroăng kal tiô troăng rơ’jíu, um tơvi ƀă Internet xông tơpui a hneăng hôp

Ki rơhêng vâ tối, tung pơla pơreăng COVID-19 xông tâ tú ó tung hơnăm 2021, Rơ’jíu Việt Nam hiăng tơkŭm po mâu roh pơtâng tối trâu hơngế ‘na tơdroăng hbrâ mơdât pơreăng. Hơnăm 2022, Kăn cheăng tung Tíu xiâm Đảng, Kăn xiâm pơkuâ Rơ’jíu Việt Nam tối rơdêi: Rơ’jiú Việt Nam kô tơkŭm hên ăm tơdroăng vêh pơ’lêh ƀă tơkŭm pơ’lêh pêi cheăng xúa kơmăi kơmok vâ pêi pro tơtro hnoăng cheăng kal kí châ Đảng ƀă Tơnêi têa pơcháu ăm.

Hơnăm 2022, Rơ’jíu Việt Nam kô tơkŭm po Tơ’noăng tơpui tung rơ’jiú lâp tơnêi têa roh má XV a Pơlê kong kân Hồ Chí Minh ƀă tơdroăng kal kí, rêh ối pơlê pơla - ngê̆ thuât Leh tơbâ 92 hơnăm hâi mơjiâng Đảng Kŏng san Việt Nam.

A Sa Ly tơplôu ƀă tơbleăng