A roh ngăn mơđah tơbleăng má mơ’nui ahdrối vâ mơđah tơbleăng tâi tâng tơdroăng ƀă séa ngăn inhên mâu tơdroăng xiâm tơkŭm po Leh tơbâ. Klêi kơ’nâi tơmâng rơkong veăng tơpui ‘na tơdroăng xiâm dêi mâu kăn teăng mâ, pôa Đỗ Văn Chiến, Phŏ Kăn hnê ngăn hnê mơhno má môi Kuô̆k hô̆i mơnhên mâu kơ koan, tíu pêi cheăng hiăng mơnhông hiâm mơno pôu râng hnoăng cheăng, mơ-eăm hên, tơtro, hbrâ pêi pro inhên gum tung tơdroăng tơkŭm po Leh tơbâ tơtro má môi.

Phŏ Kăn xiâm hnê mơhno má môi Kuô̆k hô̆i xuân xo vế túa ki rơkê tơtro a tơdrêng ƀă tơdrêng tơpui hnê mơhno ƀă mâu tíu pêi cheăng ‘na tơdroăng tơkŭm po, tíu tơdah, tơdah mâu kăn teăng mâ, tơdroăng po tơdroăng Leh tơbâ, rơnuâ leh tơdah, tơniăn gâk kring tơniăn. Tiô pơkâ pêi, Leh tơbâ 80 hơnăm Hâi Tâ phĭu rah xo apoăng Kuô̆k hô̆i Việt Nam kô châ tơkŭm po kân krip a kơxo ah (6/1/2026) a Hngêi hôp kân Diên Hồng, Hngêi Kuô̆k hô̆i, Rơ’jíu Việt Nam kô mơ’no tơdrêng Leh tơbâ kân krip kố.