VOV4.Xơ Đăng - Vâ chê troh Têt Lo hơnăm nếo Nhâm Dần, hâi lơ 16/1, pôa Hầu A Lềnh, Ngế xiâm, Kăn pơkuâ Vi ƀan hdroâng mơngế hiăng troh lăm pôu, diâp kơxuô tơmeăm rơpŏng kơtiê, rơpŏng ai hnoăng tơnêi têa ƀă mơngế ki kuăn pơlê loi tơngah tung vâi krâ hdroâng kuăn ngo a kong pơlê Bắc Kạn. Troh lăm pôu tơring Ngân Sơn, kong pơlê Bắc Kạn, pôa Hầu A Lềnh hiăng diâp kơxuô tơmeăm kơnâ 50 rơtuh liăn ăm Khu pơkuâ râng kơxô̆ liăn mơhnhôk hriâm dêi tơring.

Pôa Hầu A Lềnh, Ngế xiâm, Kăn pơkuâ Vi ƀan hdroâng mơngế lăm pôu ƀă diâp kơxuô tơmeăm Têt Lo hơnăm nếo a Bắc Kạn

Akố, pôa Hầu A Lềnh xuân hiăng diâp 150 hnoăng kơxuô tơmeăm ăm rơpŏng ai hnoăng tơnêi têa, rơpŏng ai troăng hơlâ tŏng kum, rơpŏng ai tơdroăng rêh ối pá puât ƀă mơngế ki kuăn pơlê loi tơngah tung vâi krâ hdroâng kuăn ngo kong pơlê Bắc Kạn. Pêi cheăng ƀă khu râ kăn pơkuâ kong pơlê Bắc Kạn.

Pêi cheăng ƀă khu râ kăn pơkuâ kong pơlê Bắc Kạn, pôa Hầu A Lềnh pơkâ thế kong pơlê pơtối pêi pro tro mâu tơdroăng pơkâ xiâm môi tiah Tơdroăng mơjiâng thôn pơlê nếo. Tơdrăng pơkâ xiâm tơnêi têa kơdroh kơtiê krá tơniăn ƀă hía hé, tơtrŏng mơnhông cheăng kâ ƀă mơdêk tơdroăng rêh ối kuăn pơlê.

A Sa Ly tơplôu ƀă tơbleăng