Klêi mê, rơkâu pôa Huỳnh Thành Đạt pêi cheăng tíu ki nếo, pôa Nguyễn Trọng Nghĩa, Ngế xiâm Khu pơtâng tối tơdroăng kal ƀă Hnê mơhnhôk cheăng Tơnêi têa tối tiah kố, kố cho môi ivá rơdêi nếo ƀă môi tơdroăng ki nếo vâ Khu pơtâng tối tơdroăng kal ƀă Hnê mơhnhôk Tơnêi têa pơtối pêi klêi hnoăng pơkuâ châ Đảng, Tơnêi têa ƀă kuăn pơlê pơcháu.

Pôa Huỳnh Thành Đạt kot mâ a Bến Tre, châ hriâm tơniăn tro, tơkâ luâ hên tíu cheăng. Tung tơdroăng cheăng ngế xiâm ngăn Khoa hok ƀă Kong ngê̆, pôa Huỳnh Thành Đạt hiăng veăng gum, ăm kơvâ khoa hok ƀă kŏng ngê̆ mơnhông tơƀrê kân. Khoa hok ƀă Kong ngê̆ cho môi tung mâu kơvâ cheăng ki mơnhông, mơdêk pơhlêh nếo tơmiât pêi rơkê, cho ivá vâ tơnêi têa mot tung chal ki nếo, chal mơ-eăm dêi tơná dêi hdroâng mơngế.

Xua mê hnoăng cheăng, ƀă tơdroăng ki pôu râng dêi Khu pơtâng tối tơdroăng kal ƀă Hnê mơhnhôk cheăng Tơnêi têa kal mơdêk rơdêi pơhlêh kơxô̆ tung tơdroăng cheăng pơkâ hiâm mơno, um tơvi troăng hơlâ tŏng gum troh rêm ngế kăn ƀô̆, đảng viên ƀă kuăn pơlê.