Kơxo lơ 6/8, a Hà Nội, pôa Lê Minh Hưng, Ngế pro xiâm hnê ngăn Chin phuh, Kăn pơkuâ Khu hnê mơhno kring tơniăn măng internet tơnêi têa Việt Nam (6/8/2024 - 6/8/2026) tung po tơdroăng pêi cheăng xua Khu hnê mơhno Kring tơniăn măng internet tơnêi têa tơrŭm ƀă Khu xiâm Kŏng an tơkŭm po dó inâi “xua môi tíu măng internet rơkê ăm rêm ngế.’’ Xông tơpui pơxiâm po rôh leh, pôa Lê Minh Hưng, Ngế pro xiâm hnê ngăn tơnêi têa tối nhên, tơnêi têa dế mot a chal mơnhông ó rơdêi dêi khoa hok, kŏng ngê̆, pơhlêh nếo tơmiât pêi rơkê ƀă pơhlêh xúa kŏng ngê̆, mơnhên kố cho ivá ki xiâm vâ mơdêk pêi lo tơmeăm tung pêi cheăng, ivá tơbriât cheăng dêi tơdroăng cheăng kâ tơnêi têa, gum pêi pro pơkâ tơtêk cheăng kâ péa kơxô̆.

Tơdroăng xiâm tơbleăng a rôh hôp kơxô̆ 57 dêi Khu xiâm kal kí ‘na châ tơƀrê hluâ pơkâ mơnhông khoa hok, kŏng ngê̆, pơhlêh nếo tơmiât pêi rơkê ƀă pơhlêh xúa kŏng ngê̆ tơnêi têa hiăng mơnhên inhên: Tơniăn hnoăng pơkuâ tơnêi têa tung măng internet; tơniăn gâk kring măng, kring tơniăn ‘noăng chư chêh, tơniăn tơdroăng nếo ai dêi khu tơrŭm cheăng ƀă ngế krê cho pơkâ đi đo, ôh tá păng lôi tung tơdroăng mơnhông khoa hok, kŏng ngê̆, pơhlêh nếo tơmiât pêi rơkê ƀă pơhlêh xúa kŏng ngê̆ tơnêi têa.