Klêi kơ'nâi Leh tơdah păng 'nâng, pôa Lê Minh Hưng ƀă pôa Saleumxay Kommasith hiăng tơpui tơno. Péa Ngế pro xiâm hnê ngăn tơnêi têa tối ăm dêi rơpó 'na tơdroăng rêm tơnêi têa, troăng prôk la ngiâ, pơkâ mơnhông tung la ngiâ ƀă mâu tơdroăng xiâm tơbleăng pơkâ Hneăng hôp Đảng dêi rêm tơnêi têa.

Péa Ngế pro xiâm hnê ngăn tơnêi têa tối phiu ro hlo mâu tơdroăng mơnhông tơƀrê ƀă tŭm têk dêi tơrŭm cheăng pơla péa pâ tung pơla hdrối nah; pơtối mơnhên tơrŭm cheăng pơla Việt Nam – Lếo cho tơdroăng ki kal má môi tung troăng hơlâ tơpui kâ dêi rêm tơnêi têa. 'Na cheăng kâ, péa pâ khĕn kơdeăn tơrŭm cheăng 'no liăn cheăng pơtối cho tíu ki eăng tung tơrŭm cheăng pơla péa pâ. Việt Nam nôkố ai dâng 300 tơdroăng tơkêa bro mơ'no liăn cheăng a Lếo ƀă tâi tâng kơxô̆ liăn chêh inâi 7 rơtal dollars.

Péa pâ môi tuăn pơtối mơ-eăm pro tơƀrê, mơdêk ki tơƀrê ƀă tơdjêp pơla péa tơdroăng cheăng kâ; tơrŭm mơjiâng troăng prôk ƀă mâu tơdroăng pơkâ pêi ki nhên vâ djâ kơxô̆ liăn pêi lo ing tê mơdró pơla péa pâ châ 5 rơtal dollars. Drêng kố, pôa Lê Minh Hưng, Ngế pro xiâm hnê ngăn Chin phuh tơbleăng Việt Nam kô mơjiâng ăm kuăn pơlê Lếo péa to hngêi trung, ƀă tâi tâng kơnâ 2 rơtuh dollars.